Uniun purtadra - Elena Luzio surpiglia presidi SRG.R da Vincent Augustin
Elena Luzio surpigli il presidi da la SRG.R da Vincent Augustin. La suprastanza da la SRG.R aveva ordavant proponì la Surmirana per quest post. I sa tracta dal presidi da l’uniun purtadra da Radiotelevisiun Svizra Rumantscha.
La radunanza generala da la SRG.R, l'uniun purtadra da Radiotelevisiun Svizra Rumantscha, ha elegì Elena Luzio unanimamain sco nova presidenta. Ella suonda a Vincent Augustin che dat suenter otg onns sin la fin dal 2026 giu il post cunquai ch’el accumplescha quest onn 70 onns.
Legenda:
Elena Luzio è actualmain vicepresidenta da la SRG.R e surpiglia sin l'onn 2027 il presidi da Vincent Augustin.
SRG.R
Elena Luzio ha 44 onns, è oriunda da Savognin ed abita a Turitg.
Tranter auter ha ella fatg in «Executive Master of Business» a Son Gagl ed ha lavurà en differentas funcziuns directivas tar las Viafiers federalas e dapi il 2022 è ella commembra da la direcziun da Scheuchzer SA, ina firma cun radund 500 collavuraturas e collavuraturs.
Tge è la SRG.R?
Avrir la boxSerrar la box
La SRG.R è la societad purtadra da l’interpresa Radiotelevisiun Svizra Rumantscha (RTR). Ensemen cun las societads purtadras da la Svizra tudestga, Svizra taliana e Svizra franzosa furma ella la societad SRG SSR.
La SRG.R represchenta la Svizra rumantscha en il sectur radio, televisiun e multimedia e procura cun sia unitad d’interpresa RTR per ils programs rumantschs.
Ella ha radund 1000 commembras e commembers. La commembranza è averta a tut las persunas. Ins po er daventar commembra sco uniun, fatschenta u vischnanca.
Thomas Malgiaritta en suprastanza
Cun sia elecziun per il presidi è vegnì vacant il post dad Elena Luzio en la suprastanza. Per quel post en suprastanza ha la radunanza elegì Thomas Malgiaritta da Müstair.
Legenda:
La suprastanza propona Thomas Malgiaritta per la suprastanza.
SRG.R
Plinavant ha la radunanza generala da la SRG.R elegì Anna Rita Stoffel da Cuira en il cussegl regiunal.
