Decennis a la lunga ha l’uvestgieu sa sparunà cunter l'ir dal temp. Uss èsi auter, i duai dar midadas – dentant sa chapescha adina en las schainas da quai ch’il Vatican, pia la baselgia mundiala, lubescha.
Il mardi passà èn 60 exponentas ed exponents da l’uvestgieu sa radunads a Nossadunnaun per discutar co ch’ins pudess realisar gia uss tschertas ideas dal process sinodal. Era ils uvestgieus da Basilea e Son Gagl fan vinavant. Ils auters uvestgieus en Svizra spetgan fin che Papa Francestg tira en dus onns sias conclusiuns.
Entaifer las schainas da Roma
Malgrà la prontadad da sa mover, vul l’uvestgieu restar en las schainas lubidas da la baselgia catolica mundiala. Tar temas brisants sco l’ordinaziun da dunnas, il celibat, la lètg per omosexuals u la communiun per divorziads, na haja l’uvestgieu nagina pussaivladad dad agir, di Rudolf Vögele, coordinatur dal process sinodal en l’uvestgieu.
Nus faschain quai ch’è pussaivel senza stuair sa giustifitgar visavi il Vatican.
Ma datti lura anc pussaivladads dad agir? Gea, manegia Rudolf Vögele. I na vegnia betg adina cumandà da surengiu dals spirituals. Era las laicas u ils auters collavuraturs en las plaivs ed en la diocesa vegnian udids.
Uvestg è losch
Joseph Maria Bonnemain s’exprima plain laud suenter l’inscunter a Nossadunnaun. El saja losch da vesair la prontadad da sa metter en moviment cun il process sinodal. Ma tge vul sinodal atgnamain dir?
Sinodal munta la tenuta da tadlar e savair, quai che l’auter di è prezius per mai.
Cun sinodal na saja betg manegià en il senn da votaziuns u da guardar tgi che haja ina maioritad – mabain sco tschertga d’in consens. La baselgia sa fatschentia memia fitg cun sasezza, empè da propi s’occupar dals problems dals umans.
Nova tempra
Jau sent ina enorma midada en l’uvestgieu.
Flurina Cavegn è stada da la partida a Nossadunnaun. Tge è sa midà dapi che Joseph Maria Bonnemain stat a la testa da l'uvestgieu? Oz stettian ins en dialog in cun l’auter. A Nossadunnaun hajan ins pudì discutar avertamain e dir l’opiniun. La cultura da dialog saja sa midada a moda nunditga.