La pussaivladad da porscher las vaccinaziuns en scola dettia vinavant da la vart dal chantun. Sch’ins veglia lura far quai u betg, quai stoppia mintga scola decider sezza, di la media chantunala Marina Jamnicki.
La decisiun singula d’in uffant na duai betg vegnir politisada.
La strategia da vaccinar dal chantun resta la medema. Els veglian vaccinar uschè bleras persunas sco pussibel. Quai surtut en ils centers da vaccinar, là vegnan las pli bleras persunas vaccinadas. Vitiers vegn vaccinà vinavant tar ils medis da chasa, las apotecas, ils bus da vaccinar e tut tenor en las scolas.
Acziun da vaccinar a Cuira annulada
Suenter ch’igl era vegnì annunzià ina demonstraziun sin l’areal da scola e ch'i aveva dà smanatschas massivas, ha la suprastanza da Cuira annullà a curta vista l’acziun da vaccinar en las scolas a Cuira glindesdi.
Persuenter èn las scolaras ed ils scolaras che vulan sa laschar vaccinar e ch'han il consentiment dals geniturs, vegnidas vaccinadas en auters lieus da vaccinar.
