A l’ur da l’acziun da vaccinar scolaras e scolars da Cuira en scola na datti uss tuttina nagina demonstraziun. Ils organisaturs sa distanzieschian da las smanatschas ch’i haja dà ed hajan appellà da betg demonstrar damaun a Cuira. Sco Urs Marti, il president da la citad da Cuira, ha ditg vinavant envers RTR, haja dà in barat tranter ils organisaturs, l'Uniun «Netzwerk Impfentscheid», e la citad.
Vaccinaziun en in lieu decentral
Il plan oriund era da vaccinar uffants sur 12 onns, ch’han il consentiment dals geniturs, gist en scola. Suenter eri vegnì enconuschent che glieud da l’entira Svizra vuleva disturbar quell’acziun. Ed i aveva er dà smanatschas cunter vita e cunter corp. Perquai n’ha l’acziun da vaccinar uss betg lieu en scola, mabain decentral. Tenor Urs Marti possia quai dentant dar, che singulas persunas vegnian tuttina al lieu, talas persunas che n'hajan betg udì che la demonstraziun saja vegnida annullada.
