L'enviern stat avant porta e cun el turna er il ristg da survegnir la grippa. Quai porta er la dumonda: Tge pon ins far per evitar u plitost minimar la pussaivladad d'ina infecziun? Dasper ina bun'igiena - sco lavar ils mauns, tegnair distanza e starnidar en il cundun - pon ins era sa laschar vaccinar.
Cun ina vaccinaziun pon ins evitar in'infecziun u levgiar il decurs da la malsogna.
Quella vegn recumandada a persunas a partir da 65 onns, ed a persunas cun ina malsogna cronica.
La quota en Svizra è plitost bassa
La quota da persunas che sa laschan vaccinar è en cumparegliaziun cun l'Europa plitost bassa. Cifras precisas na datti dentant betg.
Per quest onn n'avain nus betg cifras concretas. Ma nus savain che radund 37% da las persunas sur 65 onns sa laschan vaccinar.
Per congualar: En l’Europa è quella quota pli auta, numnadamain tar bun 48% tar l'ultima statistica (2022).
Pandemia ha influenzà la discussiun da vaccinar
Tenor la media chantunala saja dapi la pandemia da corona la populaziun vegnida pli critica envers vaccinaziuns. Las raschuns per quel svilup sajan differentas. Il problem saja savens che bleras persunas na sappian betg giuditgar, tge infurmaziuns che sajan vairas, e tgeninas betg. Tuttina saja bun che ins possia s'infurmar davart las vaccinaziuns.
Persunas hajan pers in pau la fidanza en las persunas dal fatg. Ellas guardan plitost sin las plattafurmas d'internet.
Ma i saja simplamain impurtant ch'ins s'infurmeschia tar funtaunas crediblas. Per quai datti recumandaziuns sin la pagina d'internet da l'Uffizi federal per sanadad. Ins po er chattar infurmaziuns sin la pagina da la Confederaziun. Natiralmain pon ins er adina dumandar persunas dal fatg; sajan quai medis e medias, u persunas da l'apoteca.
I dat er adina dapli persunas sin social media che sa mettan ensemen, e che sustegnan l'ina l'autra cun lur opiniun.
En vista a l'enviern è ina chaussa en mintga cas clera: La decisiun per u cunter vaccinar resta ina decisiun persunala. S'infurmar per pudair decider saja dentant essenzial.
