La finamira è d’analisar las schanzas e las consequenzas d’ina fusiun. Ina nova vischnanca dumbrass circa 600 abitantas ed abitants e cumpigliess in territori da 117 kilometers quadrats – tge che correspunda circa ad in quart da la regiun Moesa.
Rosanna Spagnolatti che presidiescha la Comissione Fusione Valle Calanca di ch'il temp saja madir per ina nova fusiun. La davosa saja stada l'onn 2015 nua che la vischnanca da Calanca saja ida en vigur. Las sfidas d'ozendi sajan grondas e d'occupar posts en suprastanza na saja betg adina simpel.
Nus essan adina pli savens confruntads cun novas sfidas e midadas structuralas da la societad. Per part èsi grev da chattar persunas ch'èn prontas da surpigliar questas incumbensas, era en funcziuns da manar.
Era las lavurs che las administraziuns han da far ozendi, daventian adina pli cumplexas, di Spagnolatti.
Al studi da realisabladad da fusiun fan part Buseno, Calanca, Rossa e Santa Maria en Calanca. Betg da la partida è per il mument Castaneda. Las quatter vischnancas cun la veglia da fusiunar deploreschan quella decisiun, accentueschan dantant che la porta restia averta per ina participaziun pli tard e speran sin ina reponderaziun. Castaneda saja il mument occupà cun l'ovra idraulica Calancasca, che Castaneda vul surpigliar ensemen cun trais autras vischnancas dal Mesauc e la Val Calanca. Quai en connex cun l'uschenumnà «Heimfall», nua che scada ina concessiun. Attili Savioni, il president communal da Castaneda di, ch'i na saja ussa betg il dretg mument da lantschar discussiuns da fusiun – ins duai desister da la fusiun per in pèr onns.
Rosanna Spagnolatti ch'è vicepresidenta communala da Buseno n'è betg incantada da questa posiziun. Gugent avess ella ina fusiun da l'entira Val Calanca, ma ins na possia obligar nagin da far part e sche Castaneda ponderescha pli tard da far part, sajan els anc adina bainvegnids, di la presidenta da la cumissiun da fusiun Val Calanca. Ma obligar na possian ins la fin finala nagin da fusiunar, di ella.
Sco proxim vegn fatg in studi che s’occupa cun l'organisaziun, las finanzas e las perspectivas da svilup. Il studi duess esser pront en il decurs da l’onn che vegn. Suenter duessan las radunanzas communalas decider davart la fusiun.