Curt suenter ch’il frar da la presidenta communala, Anna Giacometti, Marco Giacometti aveva annunzià da vulair candidar in’ulteriura giada per il presidi da la Val Bregaglia, è er l’independent Fernando Giovanoli siglì sin il carussel sco candidat. L’architect era fin avant in onn en la suprastanza communala da la vischnanca fusiunada.
Sco terz figurescha il deputà da la PLD Maurizio Michael sin la glista dals nums che vulan succeder ad Anna Giacometti.
Nov ha la PPS Bregaglia annunzià la candidatura da Gianluca Giovanoli per il presidi, el è actualmain er commember da la suprastanza communala.
Fin ils 8 da matg han ils votants da la Val Bregaglia gì temp d’innoltrar ina candidatura per il presidi. Quels nums vegnian er publitgads uffizialmain da la vischnanca per las tschernas il zercladur, ha declerà la secretaria communala, Giulia Giovanoli.
Numnadamain èn quai:
- Marco Giacometti, Stampa
- Fernando Giovanoli, Soglio
- Maurizio Michael, Castasegna
- Gianluca Giovanoli, Vicosoprano
Tenor constituziun communala pon ils abitants er annunziar lur candidatura per in dals uffizis vacants pir l’ultim mument.
Per in sez en la suprastanza communala van actualmain trais persunas en cursa: Stefano Crüzer, Stefano Maurizio e Jürg Wintsch.
Anna Giacometti aveva annunzià sia demissiun sco presidenta, causa ch’il pensum da 70% al timun da la vischnanca da la Bregaglia e l’engaschament sco cussegliera naziunala cun var 50% è daventà memia bler.
Las elecziuns substitutivas per ils uffizis en Val Bregaglia han lieu en in emprim scrutini ils 7 da zercladur 2020.