In project archeologic è vi da far lavurs d'exchavaziuns a Piuro, in lieu ch'è vegnì sepulì cumplettamain d’ina bova l’onn 1618. Sper il chalesch han students chattà ensemen cun archeologs er pliras fossas – in indizi ch’il stgav pudess esser en stretga vischinanza da la baselgia Santa Maria da l’anteriur lieu da Piuro. Quai ha confermà il president da l’Associaziun taliana-svizra per stgavaments a Piuro, Gianni Lisignoli.
Il chalesch vegnia examinà e perscrutà a l’Universitad da Verona ch'è er participada vid il project A.M.A.L.P.I 18. In project d’Interreg che perscrutescha tranter auter la bova da Piuro e sias consequenzas.
Gronda relevanza
Tenor il professur da l’universitad da Verona, Fabio Saggioro, èn surtut las munaidas exchavadas a Piuro da gronda valur istorica. Grazia a la scuverta dal chalesch hajan ins uss er ina conferma ch’ins saja sin la dretga via, uschia Gianni Lisignoli. La visualisaziun en 3D dal «Pompei da las Alps», sco che Piuro vegn er numnà, pudess esser fitg realistica. Precis al medem lieu sco presumà han ins fatg quint cun restanzas da la baselgia.
La probabilitad è gronda, dentant na pudain nus betg anc confermar, ch’i sa tracta propi da la baselgia.
Il fatg ch’ins ha chattà quest atun la munaida, skelets e chaleschs da crap, augmentia er il potenzial per chattar ulteriurs meds finanzials per las exchavaziuns a Piuro. Quellas èn segiradas per ils proxims trais onns. Quest onn duran las lavurs d’exchavaziun anc fin ils 12 d'october 2019. En ina proxima fasa l’atun 2020 speran ins ferm da chattar dapli fastizs e restanzas da la citadina da Piuro e la baselgia sepulida avant passa 400 onns.
RR novitads 17:00
