Da 427 persunas da tut las vegliadetgnas da la populaziun da la Val Moesa ch'èn vegnidas testadas han be 2,6% gì anticorpuls en il sang. Quai vul dir che be tantas persunas han effectiv gì il coronavirus.
Auter guarda il resultat dals tests ora tar las 283 persunas dal persunal da sanadad ch'èn vegnidas testadas: Dad ellas han 16,9% gì anticorpuls en il sang.
Franco Muggli, il responsabel dal project «capitale salute» ha ditg, ch’il dumber bass dad infectads en la populaziun mussia, che las mesiras da protecziun decididas da la Confederaziun sajan stadas endretgas, senza restricziuns fiss tenor Muggli il dumber dad infectads per franc stà bler pli aut.
Che prest 17% dal persunal da sanadad haja gì il coronavirus na fetschia betg surstar el. Il persunal da sanadad saja gea era stà en contact cun blers umans. E gist a l’entschatta na sajan las mesiras da protecziun betg anc stadas uschè bunas sco pli tard.
En sis mais vul Franco Muggli far in nov test, e quai cun las passa 50 persunas ch’avevan uss anticorpuls dal coronavirus en il sang. Quai per guardar, sch’ils anticorpuls èn anc adina avant maun en il sang.
