La regenza grischuna aveva dà il permiss per il project «Lago Bianco», l’ovra d’accumulaziun a pumpa, l’october dal 2016.
Cun quai che la situaziun actuala sin il martgà na permetta dentant betg ina realisaziun dal project sin il Pass dal Bernina, è quel per entant sistì. Repower vul perquai investir en il fratemp en ils implants idroelectrics existents a Robbia e Miralago.
150 milliuns en quatter onns
Parts dals implants idroelectrics da Palü e Cavaglia ha l’interpresa d’energia cun sez a Poschiavo, gia renovà dapi il 2010. A partir da l’atun 2019 vul Repower sanar ed investir en l’implant a Robbia circa 125 milliuns francs. Quel fa part dal «Salto superiore» – il sigl d’aua da la part sura da la val. Las investiziuns en l’implant a Miralago – en la part sut da la Val Puschlav – muntan a circa 25 milliuns francs. En tut quintan ins cun in temp da realisaziun da quatter onns.
Spetgà in cler signal da la val
Las duas vischnancas en la Val Puschlav, Brusio e Poschiavo han da decider a l’urna davart la cunvegna supplementara a la concessiun existenta dal 1997. In cler Gea da tuts dus lieus ils 19 da matg fiss optimal, uschia il podestà da Poschiavo, Giovanni Jochum. I saja da grond’impurtanza che la populaziun mussa quant ch’ins stima la preschientscha da l’interpresa. Adina puspè datti numnadamain famas che l’interpresa d’energia pudess bandunar Poschiavo sco sez principal.
RR actualitad 07:00