Fin il 1991 valeva en tut la Svizra la vegliadetgna da votar 20. Lura èsi vegnì sbassà sin 18 onns. Actualmain vegn discutà adina puspè ina vegliadetgna da votar da 16 onns. En ils pajais vischins Germania u Austria è quai gia vegnì realisà. Er en il chantun Glaruna pon ils giuvenils da 16 onns gia far diever da lur dretgs politics. Uss vegn quai discutà era en il Grischun.
L'onn 2022 aveva il Cussegl grond incumbensà la regenza grischuna da stgaffir la basa legala per la vegliadetgna da votar 16. La regenza ha ussa dà en consultaziun in sboz che dura fin ils 6 d' avust.
Persunalmain sun jau persvas che quai rinforza la democrazia.
Tenor Marcus Caduff saja impurtant dad integrar las generaziuns pli giuvnas en la politica. Ins fetschia quai dad ina vart cun la furmaziun politica en las scolas, da l'autra vart era cun sa participar ad elecziuns e votaziuns. I giaja a la fin per l'avegnir, cun il qual ils pli giuvens ston viver il pli ditg.
Marcus Caduff haja, cura ch'el era sez en quella vegliadetgna, strusch pudì spetgar enfin ch'el possia far diever da ses dretgs politics. En general possian ins dir ch'ils giuvenils pon gia surprender responsabladad en uniuns u durant la lavur, ed era votar ed eleger cun ina tscherta furmaziun politica.
Jau quint cun ina debatta plain tensiun e cuntraversa.
Sche la consultaziun avess dad esser positiva, vegn il Cussegl grond a debattar davart las leschas e davart la midada da la constituziun. Alura vegniss il project davant il pievel e pudess – tut tenor il resultat – entrar en vigur gia a partir da l'onn 2028.
