Il 2025 è stà in onn turbulent areguard l'aura: Il zercladur èsi stà fitg chaud e sitg cun bler sulegl. Quai saja stà impurtant per la fluriziun e la fructificaziun da las flurs, sco Walter Fromm menziuna. Or da quellas flurs sa sviluppeschan alura las ivas. Pia: Bleras flurs fructifitgadas dattan bleras ivas – uschia è quai stà quest onn il cas. Ma la massa plievgia dal fanadur e da l'avust ha procurà per ina schletta qualitad da quella fulla da fritgs.
Il cumissari da viticultura declera quai uschia: Blera plievgia ha per consequenza che las ivas absorbeschan enorm bler aua, la pel da las ivas sa stenda fin al maximum e schloppa lura insacura. Uschia datti alura lieus d'entrada per bulieus u insects. Quai chaschuna donns vi da las ivas.
Perquai na saja el betg uschè cuntent cun la qualitad da las ivas quest onn en cumparaziun cun l'onn passà.
L'onn passà avain nus gì in nausch onn quai che pertutga la quantitad, ma per la qualitad èsi stà in fitg bun onn. Quest onn sa mussa il vair cuntrari: Nus avain bleras ivas, ma la qualitad n'è definitivamain betg la medema sco il 2024.
Blera lavur per las viticulturas ed ils viticulturs
Durant la vendemia èsi perquai decisiv da racoltar ivas saunas e senza donns. Durant ma era gia avant la vendemia ston ils purs e las puras da vin selecziunar: Las singulas ivas nauschas vegnan prendidas davent toc per toc e na vegnan betg en la pressa. Quai pudess uschiglio avair consequenzas negativas per la qualitad ed il gust dal vin.
-
Bild 1 von 1. Walter Fromm. Il cumissari da viticultura dal Grischun controllescha las ivas sin la vigna dal Plantahhof a Malans. Bildquelle: RTR.
Pervi da la gronda lavur da las viticulturas e dals viticulturs en il Signuradi – saja quai il tractament cun meds per proteger las plantas u la tscherna da las nauschas ivas – na dubita Walter Fromm betg ch'i dettia dentant era quest onn puspè ina buna annada.
Jau ma legrel fitg sin ils aromas da fritgs, là spetg jau relativamain bler. Da la colur: jau crai ch'i daventia plitost in pinot cler e tipic cotschen rubin.