La Viafier retica ha transportà dapi l'onn 2016 bler dapli persunas ch'autras viafiers en il pajais. Spezialmain sin la lingia dal Bernina. Quella maina ils passagiers e las passagieras da l’Engiadin'Ota, tras il Puschlav a Tirano. Là èn en trais onns viagiads 71% dapli persunas. Quai è ina buna novitad per la Viafier retica, ma ella maina era problems.
Las fins d'emna èn ils trens savens uschè plains che dapli glieud vul viagiar che quai ch'i ha plaz. Quai è ina gronda sfida. Perquai vegnia a dar ina nova purschida, uschia che persunas pon reservar ina plazza per tschintg francs. Quai duess gidar a tegnair la survista da las plazzas gia occupadas. E pli paucas persunas ston star en pe.
L'urari da la Viafier retica vegn adattà
Pervi d'ina lescha taliana ha la Viafier retica stuì prender mesiras. Els han stuì ralentar il tempo en la citad da Tirano da 25 km/h sin 15 km/h, ed era pervi da differents plazzals. Perquai è il Bernina Express adina puspè arrivà memia tard, e bleras passagieras ed passagiers han pers il tren da colliaziun.
Per garantir en l'avegnir in'arrivada punctuala ha la Viafier retica adattà l'urari. A partir da mez december ferma il tren dal Regioexpress tranter San Murezzan e Tirano betg pli tar las staziuns Campacologno e Li Curt.
In nov project en ils stadals
La Viafier retica vuless meglierar ils binaris ed ils trens, per che dapli persunas possian viagiar, e per ch'i daventia pli cumadaivel per ils passagiers. Novs trens che pon circular meglier sin il traject duain remplazzar ils trens vegls. Quels empermettan dapli plazzas ed il viadi daventa pli empernaivel.
Il material rudlant sin la lingia dal Bernina è il material rudlant pli vegl che nus avain sin l'entira rait da la Viafier retica. Perquai essan nus vid ponderar schliaziuns – tge pussaivladads che nus avain per meglierar nossa purschida.
En l'avegnir duain ils trens circular pli savens, per exempel mintga 30 minutas. Ed il viadi tranter San Murezzan e Tirano duai ir pli svelt. En l'autra direcziun duain ils trens circular a Cuira senza midar tren.
Quant ch'i custa concret, na savain nus anc betg. Nus essan vi da sclerir e lavurar si questa entira problematica, per preparar ina dumonda per il maun public.
Las lavurs per il project èn en plaina acziun. Ma cleras decisiuns na datti anc naginas. La finamira fiss ina realisaziun enfin l'onn 2037.