La staziun da tren Tavau Wolfgang duai vegnir schliada enfin il december 2027. Quest pass fa part a differents midaments en il traffic public enturn Tavau en connex cun il project «Retica 30+» da la Viafier retica.
La finamira dal project è d'offrir in tren mintga mes'ura sin tut ils trajects principals dal Grischun. Quest finamira duai vegnir realisada per il traject Landquart – Tavau Platz fin l'onn 2023 e per il traject Tavau Platz – Filisur fin l'onn 2027.
Sco che la Viafier retica scriva envers la gasetta Südostschweiz saja la schliaziun da la staziun Wolfgang necessaria per ina colliaziun stabila tranter Tavau e Filisur e per realisar en l'avegnir la nova staziun giavischada Tavau Center. Perquai che la staziun sa chatta en ina curva na saja en pli betg pussaivel da renovar ella tenor ils basegns da persunas cun impediments.
Empè da la staziun Wolfgang duai da nov la staziun Tavau Laret vegnir duvrada er per il tren da Filisur. Perquai duai ella vegnir renovada, tranter auter er cun far ella accessibla per persunas cun impediments.
Midaments dal traffic public da Tavau
Er la vischnanca da Tavau vul midar sia rait dal traffic public. La suprastanza ha elavura in nov concept local, quel n'è però betg anc public. In per pass èn dentant gia enconuschents:
La staziun Tavau Laret duai esser la staziun che collia la rait da tren cun ils bus locals. La finamira è da garantir ina colliaziun tranter il tren ed il bus mintga mes'ura. Per quai duai la lingia da bus 301 vegnir prolungada dal stop «Laret Landhaus» fin la Staziun Laret. La via duai perquai vegnir schlargiada. Sco che la Südostschweiz scriva, vegn quai finanzià dal chantun Grischun e da la vischnanca da Tavau. Passagiers che duain viagiar en ils conturns da la staziun Wolfgang – per exempel tar la clinica otalpina a Tavau – possian nov duvrar la lingua da bus.
Il plan è da finir las renovaziuns da la staziun Laret fin la fin dad il 2026. La schliaziun da la staziun Wolfgang duai succeder en il 2027.
