Tenor la lescha federala vala il scumond da traffic sin vias da guaud per tuts e tuttas, exceptà l’uffizi forestal. Il chantun Grischun ha surprendì la lescha ed agiuntà che vehichels d’agricultura han er il dretg dad ir sin vias da guaud. Sin livel communal valan sper questas excepziuns er anc autras. 80% da las vischnancas han in reglament, las autras lavuran tenor la lescha federala.
Ils motivs principals per il scumond general sin vias forestalas:
- Proteger il guaud
- Evitar custs auts da mantegniment da vias
- Betg disturbar la lavur da selviculturs e selviculturas
Il guaud è in aut bain, en sia funcziun da protecziun, niz e sco abitadi.
Ina dumonda per ina lubientscha sin la vischnanca po far mintgin e mintgina, però survegnan be las persunas in permiss, che han motivs. Saja quai per il diever dal niz public, per far lavurs sin ina chamona u per in diever privat dad ir sin alp u en ina hitta.
Pussaivladads en futur
Da retrair la lubientscha ad in automat u ina chascha da brevs a l’entschatta da la via forestala, na correspunda betg a la lescha. Per il mument è l’unica metoda correcta dad ir sin l’administraziun communala, nua ch'ils collavuraturs u las collavuraturas san lubir activ il permiss. En futur saja tenor Urban Maissen, il manader da l’uffizi da guaud e privel da natira, pussaivel da duvrar ina app per dumandar ina lubientscha. Uschia as sa far la dumonda sur il telefonin e as survegn la resposta curt suenter dad ina collavuratura u collavuratur da la vischnanca.
Quai è ina pussaivladad che nus sco uffizi da guaud pudessan cussegliar a las vischnancas dad era instradar.
Differentas metodas en il medem chantun
Las vischnancas na pratitgeschan betg tuttina las lubientschas. Nus avain dumandà ils responsabels da las vischnancas da Trin, Vaz Sut e Zuos co els tractan dumondas per charrar.
Zuoz presuma ina raschun, Trin dat mo lubientschas ad indigens e per Vaz Sut èn las vias qua per tuts.