La vischnanca da Tumleastga ha approvà il preventiv 2024 e laschà il pe da taglia sin 110%. Quai scriva l'administraziun communala.
La radunanza communala dals 29 da november a Rodels saja stada bain visitada. Las decisiuns hajan mintgamai gì ina gronda maioritad.
Il preventiv da la vischnanca dal 2024 prevesa in surpli da custs da radund ina mesa milliun francs, dar expensas totalas da 13,65 milliuns francs. Il minus vegnia cunzunt da facturs externs sco la chareschia ed ils custs da sanadad, numnadamain dal deficit da Gesundheit Mittelbünden.
Il quint d'investiziun cuntegna investiziuns nettas da 3'072'500 francs. En quellas èn cuntegnidas l'engrondiment da locals da scola a Roten e Tumegl.
Discussiuns hai dà davart immobiglias finanzialas, e sche quellas stoppian purtar sa sezzas finanzialmain, sco che la vischnanca scriva. La suprastanza haja lantschà questa discussiun. Durant la radunanza è quai vegnì consentì, e sch'i na giaja betg, duain las immobiglias vegnir vendidas u sanadas.
A chaschun da las orientaziuns generalas èn vegnids preschentads il stan actual dal concept per la chasa da scola generala e da la revisiun da la planisaziun locala. Plinavant èn vegnids explitgads ils projects da construcziun actuals sco la sanaziun da las funtaunas e dal bigl da S. Agnöns sco er Dros Cumbischt ed Aua Freda.
