La populaziun ha l'onn 2019 ditg cun passa 55% Gea a la nova colliaziun directa da la pendiculara Brambrüesch. Avant set onns han ins discurrì da 24,4 milliuns francs. Uss è quest import per il project tar passa 40 milliuns francs – motiv saja surtut la chareschia.
Brambrüesch è la pendiculara che maina da l'ur da la citad Cuira ad aut a Brambrüesch. Entant ha questa duas parts: Ina gondla da Cuira enfin la staziun da mez Känzeli che stat dapli ventg onns. E la part sura, gondlas pitschnas cotschnas che sajan a la fin da lur vita e ston vegnir remplazzadas. Che questa segunda part sto vegnir renovada vesan tuttas dus varts uschia – l'aderenta ed era l'adversari dal nov project.
La colliaziun directa custa simplamain incredibel blers raps. Questa colliaziun directa è en questa furma en in territori da skis uschè pitschen totalmain surdimensiunada.
Tenor Mario Cortesi ch’è deputà dal Cussegl grond da la PPS e che fa part dal comité cunter il project da la colliaziun directa saja quest project surdimensiunà. Tenor el tanschessi da mo remplazzar la part sura. Quai na vesa Leonie Liesch betg uschia. Ella fa part dal comité per ed è commembra dal parlament da Cuira per il Center. I saja persistent da far ina pendiculara da giusut enfin sisum – e betg mo renovar ina part, quai dess in uschia numnà “Flickenteppich”, pia in battibugl.
E che quest project da passa 40 milliuns francs saja memia char na lascha ella betg valair. Tenor ella ins haja da calcular la perdita da racolta durant il temp da construcziun. En pli custa d’adattar la pendiculara a la lescha tenor ils basegns da persunas cun impediments.
Sch’ins quinta ensemen las singula parts che custan alura vain la colliaziun directa pli bunmartgada sco da mo renovar la segunda secziun.
Il comité cunter il project crititgescha era, che la populaziun na survegn nagina schelta. I dat mo in Gea u Na a la colliaziun directa – da reparter las renovaziuns saja betg tema. Mario Cortesi sa d'in'alternativa che vegn discutada en il parlament da Cuira, sch'i dat in Na. Numnadamain han adversaris ed adversarias da la colliaziun directa da Brambrüesch l'intenziun d'inoltrar in’incumbensa a la suprastanza da Cuira che vul mo remplazzar la part sura. Las opiniuns van era entaifer las partidas dapart – tge che la populaziun vegn a dir sa mussa ils 8 da mars 2026.