La delegaziun americana al Forum mundial d'economia a Tavau vegn manada dal minister da finanzas Steven Mnuchin. Quai ha communitgà la regenza a Washington. Sch'il president Donald Trump vegn en trais emnas en Svizra per il WEF, n'è betg cler tenor las indicaziuns uffizialas. Sper Mnuchin tutgan tar la delegaziun americana tranter auter er il minister da l'economia Wilbur Ross, minister da lavur Eugene Scalia e la ministra da transport Elaine Chao. Era part fan la figlia da Donald Trump, Ivanka e ses schender Jared Kushner.
L'onn passà aveva Trump manchentà il WEF pervi da la crisa da budget. Per l'emprima giada aveva il president american visità il 2018 il Forum mundial d'economia a Tavau.
Forum mundial d'economia WEF a Tavau
Avrir la boxSerrar la box
Il Forum mundial d'economia ha lieu quest onn per la 50avala giada. Dal 21 fin il 24 da schaner sa scuntran plirs milli participants. Tranter els politichers da renum, directurs d'interpresas e represchentants d'organisaziuns socialas. Els discuteschan davart sfidas globalas.
