Quest'emna s'inscuntra puspè l'elita da la politica e da l'economia a Tavau – quai per la 56avla giada. Il motto da quest onn è «A Spirit of Dialogue», pia la necessitad dal dialog durant temps malsegirs, ha ditg il president dal WEF Børge Brende a la conferenza da medias l'emna avant il WEF. La radunanza annuala haja lieu durant il pli cumplex temp geopolitic dapi l'onn 1945, ha el agiuntà. Ils temas principals dal WEF vegnan quest onn ad esser l'Ucraina, l'Iran, Gaza e Venezuela.
Themen in diesem Newsticker
- Inscunter suprem da l'UE davart la Grönlanda
- Tschajera impedescha giasts dal WEF d’atterrar ad Altenrhein
- Clausula da WEF – fittadins ston far plazza en lur abitaziuns
- Martin Pfister visita truppas a Tavau
- La regenza iranaisa tuttina betg al WEF
- «USA House»: la Baselgia libra Tavau daventa il center dal WEF
La preparaziun avant il WEF
Tschertas lavurs en vista dal Forum mundial d’economia WEF cumenzan gia emnas avant l’eveniment. Locals vegnan rumids or ed affittads a delegaziuns u firmas internaziunalas. Entiras fatschadas vegnan midadas ed edifizis temporars creschan ord il funs uschè lunsch che l’egl po tanscher. Durant ils tschintg dis dal forum è Tavau in auter lieu che durant il rest da l’onn. RTR ha fatg ina visita paucs dis avant il WEF per survegnir vuschs ed impressiuns davart la transfurmaziun da la citad alpina.
En il temp da preparaziun per il Forum mundial d’economia WEF, inscuntra ins sin ed enturn la promenada da Tavau regularmain indigenas ed indigens che crititgeschan tut ils plazzals en connex cun l’eveniment. Ina cuminanza d’interess, cun il num «Davos+» vul ussa porscher ureglias avertas per la critica da la populaziun.
Impressiuns da la promenada a Tavau
-
Bild 1 von 12. Bildquelle: RTR.
-
Bild 2 von 12. Bildquelle: RTR.
-
Bild 3 von 12. Bildquelle: RTR.
-
Bild 4 von 12. Bildquelle: RTR.
-
Bild 5 von 12. Bildquelle: RTR.
-
Bild 6 von 12. Bildquelle: RTR.
-
Bild 7 von 12. Bildquelle: RTR.
-
Bild 8 von 12. Bildquelle: RTR.
-
Bild 9 von 12. Bildquelle: RTR.
-
Bild 10 von 12. Bildquelle: RTR.
-
Bild 11 von 12. Bildquelle: RTR.
-
Bild 12 von 12. Bildquelle: RTR.
En tut quintan ins cun dapli che 3'000 participantas e participants da 130 pajais, tranter auter 64 schefs e scheffas da stadi. La plazza aviatica da Turitg quinta durant quels dis cun passa milli sgols dapli.
Tgi è da la partida?
A Tavau s’inscuntra durant il Forum mundial d’economia WEF tut quai che ha num e pum or da politica ed economia. Quel num che polarisescha il pli ferm è Donald Trump. Il president dals Stadis Unids da l’America che stat sut gronda critica pervia da sia politica d’immigraziun e da l’exteriur vegn per la terza giada a Tavau suenter sias visitas il 2018 e 2020. Tge pensan las ed ils da Tavau da sia participaziun? Ina tura tras Tavau, che cumenza en in local da tradiziun.
-
Bild 1 von 3. Nihat Bartamay, possessur da la Kebap Bar. Bildquelle: RTR.
-
Bild 2 von 3. Hans Peter Michel, Landamma da Tavau dal 2005-2012. Bildquelle: RTR.
-
Bild 3 von 3. Per Trump èsi la terza giada ch'el viagiescha al WEF. Durant ses emprim temp d'uffizi è el stà duas giadas da la partida (foto dal 2018). L'onn passà è el sa participà virtualmain. Bildquelle: Keystone.
Trump vegnia accumpagnà da la pli gronda delegaziun americana ch'igl haja insacura dà a Tavau, ha annunzià il president dal WEF, Børge Brende. Tar la delegaziun tutga il minister d'exteriur Marco Rubio, il minister da finanzas Scott Bessent, il minister da commerzi Howard Lutnick, l'incumbensà spezial Steve Witkoff ed il schender da Trump Jared Kushner. Fin uss na datti anc nagins detagls davart il program dal president american. Tenor rapports da medias vegnia Trump spetgà la mesemna ils 21 da schaner e resta a Tavau per dus dis.
Era da la partida vegn ad esser il president ucranais, Wolodimir Selenski. La Russia percunter è vinavant betg envidada. Il primminister libanais saja er da la partida e per l'emprima giada insumma er il president da la Siria, ultra da quai ina gronda delegaziun dals Emirats Arabs Unids. Plinavant spetg'ins ina gronda delegaziun or da l'Africa, perquai ch'il dialog tranter l'Europa e l'Africa saja fitg impurtant.
Il president franzos Emmanuel Macron vegn a viagiar il mardi a Tavau. Là vegnia el a preschentar sia vista sin las sfidas d'economia e geopoliticas, ha communitgà il palast d'Élisée.
Da la Svizra èn vegnids annunziads quatter cussegliers federals. Uschia prenda part il president da la Confederaziun Guy Parmelin, il minister d'exteriur Ignazio Cassis, la ministra da finanzas Karin Keller-Sutter ed il minister da defensiun Martin Pfister. Parmelin, il minister d'economia vegnia a prender la chaschun per discutar cun ses collegas d'uffizi da l'exteriur davart il commerzi. Cassis vegnia tar ses inscunters bilaterals a metter il focus sin la situaziun geopolitica, surtut il svilup en l'Ucraina ed il Proxim Orient. Keller-Sutter vegn a discurrer cun ses collegas d'uffizis da l'exteriur davart dumondas da finanzas e taglia. Pfister vegnia il glindesdi a visitar las truppas dal militar al lieu. En tut sajan 40 inscunters bilaterals sin il program, ha communitgà la chanzlia federala.
La polizia e l’armada sajan pronts per il WEF e per realisar l’incumbensa da guardar per la segirtad. Durant la 56avla giada dal Forum mundial d'economia a Tavau vegnan spetgads tants VIP’s, pia persunas impurtantas, sco anc mai. En tut 64 schefs e scheffas da stadis. En sasez na dettia quai dapli lavur per la Polizia chantunala Grischuna, di il cumandant Walter Schlegel. Dapli engaschi pretendia la visita dal president dals Stadis Unids Donald Trump, el vegn per la terza giada al WEF a Tavau. Dapi dus mais saja l’ambassada americana en Svizra ad examinar il lieu e sclerir detagls cun la polizia. Dapi circa in mais è il Secret Service involvà, quai saja plitost a curta vista, di Walter Schlegel. Il Secret Service è l’organisaziun ch’è responsabla per la segirtad dal president, durant il WEF è quai era la Polizia chantunala Grischuna.
En il spazi sco en il hotel essan nus cuntents ch’il Secret Service è enturn il president. Nus, la polizia, protegin il hotel e betg la persuna singula en l'hotel.
La collavuraziun funcziuna bain cun quai che tuts han il medem interess: la segirtad. La polizia è responsabla per il event e survegn sustegn da l’armada. Da questa èn 5’000 persunas en tut la Svizra en il servetsch – 1’500 da questas en Grischun ed a Tavau. Era sch'i vegnan blers VIP’s na custia quai betg dapli. Il WEF ha in budget da 9 milliuns francs per la segirtad – e quel duess vegnir tegnì en sch'i na dat nagins eveniments extraordinaris.
Consequenzas per il turissem durant quell'emna
Il turissem en la regiun da Tavau ed il Partenz na vegnia durant quests dis betg ad esser impedì, scriva la Confederaziun. I na dat naginas restricziuns da viagiar. Uschia è Tavau accessibel per il traffic public u er cun l'auto privat. Dentant dettia controllas da persunas, vehichels e bagascha sin tut las vias d'access – quai per evitar che objects privlus vegnian purtads a Tavau. Perquai saja da quintar cun temps da spetga, scrivan las autoritads. Entaifer la vischnanca da Tavau datti dentant zonas cun restricziuns d'access.
Datti protests?
Igl èn vegnidas inoltradas 10 dumondas per protests pli pitschens e duas demonstraziuns classicas tar la vischnanca da Tavau. Ina da quellas è la spassegiada da protest annuala dal moviment «Strike WEF» da Küblis fin Tavau. Là vegn protestà cunter il «capitalissem autoritar» dal WEF, hai num en ina communicaziun. La segunda gruppa da demonstraziun è la Juso.