WEF - Descharscha per Klaus Schwab – lez sclauda funcziun tar il WEF

Il Forum mundial d'economia (WEF) a Tavau ha examinà renfatschas anonimas ch'il fundatur dal WEF Klaus Schwab haja agì nunetic renviescha il WEF ussa sco nunfundà. Ina advocatura haja examinà il cas e vegnia a la conclusiun ch'i na dettia nagut ch'ins possia renfatschar a Schwab ch'ha entant 87 onns.

Irregularitads minimalas declera il WEF cun cunfins betg clers tranter contribuziuns persunalas ed activitads per il forum. Questas mussian però plitost in ferm engaschi che l'intenziun da sa cumportar sbaglià.

Renfatschas anonimas ed in artitgel dal WSJ

Tranter auter aveva la gasetta americana «Wall Street Journal» rapportà da sbagls suponids che mussian in cumportament etic e finanzial sbaglià – quai tant da Klaus Schwab sco era da sia consorta. Il WEF aveva prendì serius las renfatschas ed instradà las examinaziuns.

Schwab era sa retratg per immediat da la direcziun. Klaus Schwab sez ha reagì sin las renfatschas. El renviescha tut las renfatschas e fa sez ina denunzia penala encunter nunenconuschent pervi da diffamaziun.

Normalisar relaziun e collavurar - però senza funcziun uffiziala

Klaus Schwab prendia enconuschientscha dals resultats da las investigaziuns, ha ditg ses pledader. El haja chattà ina cunvegna cun il WEF che duai normalisar las relaziuns in cun l'auter, e duai fullar la via ad ina collavuraziun fritgaivla en l'avegnir. El na veglia però surpigliar nagina funcziun uffiziala pli per il WEF.

Ulteriuras midadas a la testa dal WEF

Entant communitgescha il WEF era ch'il manader interimistic actual, l'anteriur schef da Nestlé Peter Brabeck-Letmathe, dat giu ses uffizi. Danov vegnan a surprender Larry Fink ed André Hoffmann - però era ad interim - il presidi dal World Economic Forum WEF. Larry Fink è fundatur da l'administratur da facultads «Blackrock», ed André Hoffmann è in descendent dal fundatur da «Roche».