Mez schaner s'inscuntra puspè l'elita da la politica e da l'economia a Tavau – quai per la 56avla giada. Il motto da quest onn è «A Spirit of Dialogue», pia la necessitad dal dialog durant temps malsegirs, ha ditg il president dal WEF Børge Brende a la conferenza da medias l'emna avant il WEF. La radunanza annuala haja lieu durant il pli cumplex temp geopolitic dapi il 1945, ha el agiuntà. Ils temas principals dal WEF vegnan quest onn ad esser l'Ucraina, l'Iran, Gaza e Venezuela.
En tut quintan ins cun dapli che 3'000 participantas e participants da 130 pajais, tranter auter 64 schefs e scheffas da stadi. La plazza aviatica da Turitg quinta durant quels dis cun passa milli sgols dapli.
Tgi è da la partida?
Il president american Donald Trump vegn definitivamain ad esser da la partida al Forum mundial d'economia a Tavau – quai han confermà ils responsabels. El vegnia accumpagnà da la pli gronda delegaziun americana ch'igl haja insacura dà a Tavau, ha annunzià il president dal WEF, Børge Brende. Tar la delegaziun tutga il minister d'exteriur Marco Rubio, il minister da finanzas Scott Bessent, il minister da commerzi Howard Lutnick, l'incumbensà spezial Steve Witkoff ed il schender da Trump Jared Kushner. Fin uss na datti anc nagins detagls davart il program dal president american. Tenor rapports da medias vegnia Trump spetgà la mesemna ils 21 da schaner e resta a Tavau per dus dis.
Era da la partida vegn ad esser il president ucranais, Wolodimir Selenski. La Russia percunter è vinavant betg envidada. Il primminister libanais saja er da la partida e per l'emprima giada insumma er il president da la Siria, ultra da quai ina gronda delegaziun dals Emirats Arabs Unids. Plinavant spetg'ins ina gronda delegaziun or da l'Africa, perquai ch'il dialog tranter l'Europa e l'Africa saja fitg impurtant.
Il president franzos Emmanuel Macron vegn a viagiar il mardi a Tavau. Là vegnia el a preschentar sia vista sin las sfidas d'economia e geopoliticas, ha communitgà il palast d'Élisée.
Da la Svizra è fin uss be vegnì annunzià il president da la Confederaziun Guy Parmelin. Il minister da defensiun Martin Pfister vegnia il glindesdi a visitar las truppas dal militar al lieu.
Consequenzas per il turissem durant quell'emna
Il turissem en la regiun da Tavau ed il Partenz na vegnia durant quests dis betg ad esser impedì, scriva la Confederaziun. I na dat naginas restricziuns da viagiar. Uschia è Tavau accessibel per il traffic public u er cun l'auto privat. Dentant dettia controllas da persunas, vehichels e bagascha sin tut las vias d'access – quai per evitar che objects privlus vegnian purtads a Tavau. Perquai saja da quintar cun temps da spetga, scrivan las autoritads. Entaifer la vischnanca da Tavau datti dentant zonas cun restricziuns d'access.
Datti protests?
Tenor la NZZ ed il Bündner Tagblatt èn vegnids inoltrads radund 10 dumondas per protests pli pitschens e duas demonstraziuns classicas tar la vischnanca da Tavau. Ina da quellas è la spassegiada da protest annuala dal moviment «Strike WEF» da Küblis fin Tavau. Là vegn protestà cunter il «capitalissem autoritar» dal WEF, hai num en ina communicaziun. La segunda gruppa da demonstraziun è la Juso.