Tenor la cunvegna da Vienna han tschertas persunas da bun in dispositiv da protecziun. Tar quellas tutgan per exempel schefs e scheffas da stadis, retgs e reginas, plinavant ministras e ministers. Radund 100 da quellas persunas arrivan quest onn a Tavau. Tenor il cumandant da la Polizia chantunala, Walter Schlegel, èn quai circa tantas persunas sco er ils ultims onns.
Auters onns èn quai stadas 120 persunas, u er ina giada 50, di Schlegel. Ils ristgs sajan terrorissem, extremissem e spiunascha. Plinavant smanatschian attatgas da cyber. La guerra en l'Ucraina n'haja betg in'influenza speziala sin il WEF, uschia il cumandant da la polizia vinavant.
5'000 schuldada e 50 kilometers saiv
Il vitg da Tavau è durant il WEF surveglià fermamain. Radund 50 kilometers saiv han commembers da l'armada e polizia mess si. 5'000 commembers da l'armada èn en acziun. Durant il WEF datti controllas da persunas e vehichels enturn Tavau. Plinavant è il pass dal Flüela serrà ed ins po pia mo arrivar a Tavau da Casti u da Landquart anora. Il spazi aviatic segireschan il militar svizzer, austriac e talian.
Al WEF s'inscuntran persunas da l'economia e politica mundiala per sa barattar e sa colliar in cun l'auter. L'occurrenza cumenza ils 16 da schaner.
