Novitads dals 17-07-2025 - Cun desister ad uras sin l'ierta na ston ins betg pajar debits

• Tgi che desista d'in'ierta avant che la persuna che relascha l'ierta è morta, na sa fa betg culpabel. Quai ha il Tribunal federal fixà en ina sentenzia directiva. Concret vai per in um cun daivets che ha desistì da sia ierta, cura che sia mamma viveva anc. Quella ha fatg si sia facultad direct als biadis. La citad da Cuira, nua che l'um aveva daivets (bun 43'000 francs), ha taxà quai sco «donnegiaziun dal creditur» ed ha purtà plant. Quai malgrà che la Dretgira chantunala grischuna aveva dà raschun als ertavels. Il Tribunal federal ha dentant renvià quest plant cun argumentar che la facultad appartegnevia a la relaschadra da l'ierta, la mamma, cura che l'um ha desistì da quella. Mo sch'in debitur renviescha l'ierta suenter che quella tutgia legalmain ad el, lura possia quai donnegiar il creditur.
• Il cass «Corona-Leaks» è mess ad acta. La procedura penala cunter l'anteriur schef da communicaziun da l'anteriur cusseglier federal, Alain Berset, è vegnida sistida uffizialmain. La procura publica federala ha confermà in rapport da las gasettas da Tamedia. I va per la supposiziun ch'il schef da communicaziun da Berset haja infurmà la Chasa editura Ringier ordavantdavart las mesiras da corona ch'il cussegl federal aveva prendì. Quest suspect n'ha dentant betg pudì vegnir verifitgà. Cunter la decisiun po anc vegnir fatg recurs.

• La parahotellaria svizra – pia abitaziuns da vacanzas, albierts da giuventetgna, campadis e chamonas –  han registrà 4,5 milliuns pernottaziuns durant l'emprim quartal. Quai è medem bler sco l'emprim quartal da l'onn passà. Quai mussan las cifras da l'Uffizi federal da statistica. La gronda part èn osps da la Svizra cun ina cumpart da passa 71%. Duas terzas da las pernottaziuns èn en abitaziuns da vacanzas. Jugis e chamonas da SAC èn vegnidas sin var 1, milliuns pernottaziuns. Plazzas da campar restan cun var 167’000 pernottaziuns plitost ina nischa.

Il di en survista