Siglir tar il cuntegn

Corona Leaks Gronda perdita da confidenza entaifer il Cussegl federal

  • Las cumissiuns da gestiun dal Cussegl naziunal e dal Cussegl dals chantuns publitgeschan il rapport davart las indiscreziuns en connex cun fatschentas da Covid-19 dal Cussegl federal.
  • Tenor il rapport po quai avair dà indiscreziuns tar 37 da 50 sesidas dal Cussegl federal.
  • Il fil direct dal departament da Berset a las medias haja chaschunà ina perdita da confidenza entaifer il Cussegl federal, di la GPK.
  • La gruppa da lavur ha fatg trais recumandaziuns: Il Cussegl federal sto ussa prender posiziun tar questas recumandaziuns – fin il favrer 2024.
  • Da dretg a sanester sa mussan las partidas preoccupadas, sco SRF rapporta.

En connex cun mesiras e fatschentas dal Cussegl federal durant la crisa da corona hai dà bleras indiscreziuns. Or da 50 sesidas dal Cussegl federal haja dà 38 giadas talas indiscreziuns e «leaks». A questa conclusiun vegnan las cumissiuns da gestiun da las chombras parlamentaras suenter in'analisa ensemen cun in expert giuridic.

Ed i na dettia nagins indizis ch'il cusseglier federal Alain Berset haja inizià talas indiscreziuns. Cler saja mo, che l'anteriur schef da communicaziun da Berset haja dà vinavant infurmaziuns classifitgadas al schef da la chasa editura Ringier. L'analisa haja però era mussà, che questas infurmaziuns na sajan betg cumparidas en ils products da Ringier. Berset haja bain savì dals contacts da ses schef da communicaziun, però para betg dals cuntegns.

En il rapport final fan las cumissiuns era pliras recumandaziuns per prevegnir a talas indiscreziuns en l'avegnir. Tranter autras da stabilir reglas liantas per discurs da responsabels da medias cun las medias e scolaziun specifica per il persunal. Enfin l'entschatta da favrer ha il Cussegl federal da prender posiziun en chaussa.

Medias da la Svizra tudestga han profità il pli

A l’analisa da medias è vegnì guardà sin 500 artitgels da las 65 fatschentas e 50 sesidas. Dals 500 artitgels eran var 200 segir u probabel indiscreziuns. Da las 50 sesidas dal Cussegl federal eran 38 pertutgadas. Per regla saja sa tractà da dumondas davart las mesiras ch’eran alura gia publicas il di avant la sesida dal Cussegl federal, u il di da la seduta dal Cussegl federal sez.

I saja vegnì constatà che oravant tut las medias da la Svizra tudestga hajan profità dals leaks, dapli che las medias da la Svizra romanda e las qualas da la Svizra taliana. Tranter las chasas da medias da la Svizra tudestga s’audian Ringier e la gruppa da Tamedia. Uschia haja per exempel sulet il Blick gì 60 indiscreziuns.

Reacziun da l'EDI

Il departament federal per fatgs interns (EDI) ha prendì posiziun vers il rapport davart ils Corona Leaks. Quel mussia ch'il cusseglier federal Alain Berset n'haja inizià nagut e che naginas infurmaziuns dadas vinavant sajan cumparidas en las medias. Ultra da quai sajan mesiras encunter indiscreziuns vegnidas instradadas surtut sin proposta dal departament da l'intern – il sulet departament ch'haja inoltrà duas denunzias penalas, scriva il departament da l'intern sin sia pagina d'internet.

Sper quai crititgescha il departament il rapport: Ch'ins saja sa focussà sin l'anteriur schef da communicaziun senza resguardar autras funtaunas pussaivlas, quai che includess auters departaments. Ed ultra da quai promovia il rapport la pregiudicaziun da l'anteriur schef da communicaziun che sa chattia en ina procedura penala.

Politica sa mussa preoccupada

Las partidas sa mussan da dretg a sanester preoccupadas da las novas scuvertas. Sco SRF rapporta, fetschian ils repretschentants da la politica dumandads cunzunt quitads davart il stadi dal Cussegl federal.

Uschia ha Cedric Wermuth, il co-president da la PS, ditg envers SRF ch'il Cussegl federal dovria per funcziunar ina tscherta confidenza da basa. Entras ils leaks saja quella donnegiada. En la medema crenna dat Philipp Mathias Bregy, il schef da la fracziun da l'Allianza dal Center. Il grond dumber d'indiscreziuns hajan fatg stremblir el en ses fundaments ed el saja persvas che questas indiscreziuns rendian pli flaivla la regenza. Il viceschef da la fracziun da la PPS, Alfred Heer accentuescha ch'i na dastgia betg pli dar indiscreziuns en il futur. Vinavant constatescha Heer, tenor il rapport da SRF, ch'i na regia anc adina betg in caracter da confidenzialitad en il Cussegl federal.

RTR novitads 18:00

Artitgels legids il pli savens