L'argument principal che fa la differenza tranter las duas manadras è il squitsch da temp. A Glion è la situaziun da persunal anc betg uschè percara. Tenor Claudia Tomaschett, hajan els anc trais, forsa era quatter fin tschintg onns spazi fin che la mancanza da persunal avess consequenzas gravantas per il manaschi da l'instituziun.
Tut autra è la situaziun en il Center da sanadad a Savognin. Là tschertgan els uschè urgent ina persuna diplomada per la chasa da tgira che la vicedirectura e manadra da la tgira, Sandra Luzio, ha sezza stuì far la midada da l'ospital en la chasa d'attempads.
Glion: l'iniziativa è pli cumplessiva
Il spazi da temp che resta anc en l'instituziun a Glion è in argument. Sper quel vesa Claudia Tomaschett cunzunt er l'avantatg che l'iniziativa pretenda meglieraziuns en plirs secturs da la tgira e betg mo tar la scolaziun e furmaziun da persunal diplomà. Quai èn per ella:
- meglras cundiziuns da lavur
- meglras premissas per cumbinar lavur e famiglia
- las pajas
- furmaziun e scolaziun sin tut ils livels dal persunal da tgira
Be cun la scolaziun n'èsi sa chapescha betg fatg. Quai è in bun pass enavant che jau prend gugent. Ma nus stuain suenter era segirar che la glieud stettia en la professiun.
La milliarda francs che la cuntraproposta prevesa sur otg onns per la scolaziun e furmaziun da persunal diplomà, saja in bun pass ch'ella prendia fitg gugent. Pertge chattar persunal diplomà saja era a Glion sco da tschertgar la guglia en il fain. Ma sulettamain cun scolaziun na saja betg fatg. I giaja er per segirar che la glieud stettia en la professiun. La fluctuaziun saja actualmain memia auta e qua dovri tenor la manadra da l'instituziun a Glion era mesiras.
Plinavant sustegna Claudia Tomaschett l'avis che dapli persunal diplomà purtassi dapli qualitad en la tgira. Tenor ella dessi uschia pli paucs sbagls e dapli peda per las persunas attempadas. Che la cuntraproposta purtassi probabel pli spert dabler daners en il sistem, da quai è Claudia Tomaschett conscienta. Tar l'iniziativa persuenter stuessan blers aspects vegnir contrahads da nov.
Savognin: il squitsch da temp pleda per la cuntraproposta
Sch'i na giessi il mument betg uschè mal en il Center da sanadad Savognin ed els avessian anc tschintg onns peda, sustegnessi er ella l'iniziativa, di la manadra da la tgira Sandra Luzio. Il cuntegn saja bun. I manchia dentant urgentamain ina persuna da tgira diplomada. La plazza saja scritta or dapi il mars, ma i n'hajan gì gnanc ina annunzia. E la finala giaja er per ademplir las pretensiuns ch'il chantun metta en connex cun il dumber da persunal diplomà.
La chasa d'attempads a Savognin ha in avantatg: Ella tutga ensemen cun il pitschen ospital, dus medis da chasa e 24 abitaziuns per senioras e seniors tar il center da sanadad. Uschia è in servetsch d'urgenza garantì da tut temp. La situaziun saja però stada uschè acuta ch'els hajan stuì ir sur ils cudeschs. La finala na saja restà nagut auter che la varianta da midar sezza da l'ospital en la chasa da tgira, uschia la vicedirectura Sandra Luzio.
Igl è gia daditg stà tschintg avant las 12 – plaunet èsi tschintg passà. Jau crai che nus avain da lavurar cun il temp. Cun la cuntraproposta avain nus pli spert in prim levgiament cun dapli persunal.
Adina puspè in u l'auter di malsaun
Ultra da quai vesia ella er durant far il plan da lavur, quant grond ch'il squitsch sin il persunal saja. I dettia adina puspè la situaziun ch'insatgi saja, suenter sis dis libers, anc in di malsaun. Quai sajan segns clers ch'il persunal haja memia pauc temp da recreaziun. Perquai èsi tenor la dunna, che lavura gia passa 25 onns per il Center da sanadad, impurtant ch'i dettia uschè spert sco pussaivel in prim levgiament entras dapli persunal.
Per tegnair la glieud en la professiun dovri dapli
Sandra Luzio è da l'avis ch'ils ulteriurs puncts sco pajas, cundiziuns da lavur u er da simplifitgar la cumbinaziun da lavur e famiglia sa schlian in zic sch'il problem da persunal vegnia pli pitschen. Cun refusar l'iniziativa na veglia quai betg dir ch'i na giaja suenter nagut pli – sin quai possian ins lura bajegiar si. La cuntraproposta saja per il mument la schliaziun che portia pli svelt il resultats necessaris.
Sin in clic tut las fatschentas federalas e communalas: rtr.ch/votaziuns