Il dumber da las firmas grischunas che pon profitar da la lavur curta sa sminuescha fitg. La fin d'avust survegnivan anc 287 firmas indemnisaziun per lavur curta, ha communitgà l'Uffizi per industria, mastergn e lavur dal Grischun. Quai è anc var in terz, cumpareglià cun il mais avant. E cumpareglià cun il zercladur è la digren anc bler pli gronda.
SECO augmenta intensitad da controlla tar lavur curta
Entant lascha il Secretariat da stadi per l'economia SECO examinar actualmain passa 200 firmas, en l'entira Svizra sch'ellas han fatg maldiever da la lavur curta. En tut hajan els survegnì fin la fin d'avust radund 1'000 annunzias d'eventualas irregularitads, scriva il SECO. Il secretariat lascha examinar il cas che pertutgan la perioda, dapi che la pandemia da corona a cumenzà.
Levet damain dischoccupaziun en il Grischun
La dischoccupaziun en il Grischun è sa reducida levet l'avust, cumpareglià cun il mais avant. Las 919 persunas dischoccupadas correspundan ad ina quota da 0,8 pertschient. Quella era il mais avant anc tar 1,2 pertschient, sco l'Uffizi per industria, mastergn e lavur dal Grischun inditgescha.
Las pli bleras persunas da la hotellaria
Da las 919 persunas senza lavur eran 391 dunnas e 528 umens. Las pli bleras persunas senza lavur datti en la gastronomia (145), sanadad e social (98), commerzi en detagl (82) sco era l'industria da construcziun (78). L'avust han ins dumbrà 164 persunas dischoccupadas da lunga durada. Cumpareglià cun il mais avant cun 174 persunas è il dumber betg sa reducì.
Quota en Svizra è sa sbassada da 2,8 sin 2,7%
Era la Svizra noda damain dischoccupaziun l'avust. La fin da l'avust eran 126'355 persunas (fanadur 128'279) senza lavur, sco il Secretariat da stadi per l'economia Seco annunzia. Quai èn 1924 dischoccupads u dischoccupadas damain ch'il fanadur. La quota è sa sbassada da 2,8 sin nov 2,7 pertschient. Quest regress ha motivs stagiunals. La stad vegn adina tschertgà forzas da lavur sin plazzals ed en il turissem.
