Tuttas e tuts duain avair ils medems dretgs, quai è la raschun principala per Anton Capaul e Mirco Tscharner da dir Gea ils 26 da settember a la lètg per tuts. Sper il dretg da maridar, vai en quella proposta era persuenter, sche duas dunnas u dus umens dastgan adoptar uffants e sche duas dunnas dastgan survegnir in uffant entras la donaziun da sems. E qua sa spartan las opiniuns dals dus umens omosexuals.
Sa chapescha pli gugent dus babs che nagin. Ma jau pens ch’in uffant dovra in bab ed ina mamma.
Quai vesa Mirco Tscharner da Schiers auter. Il giuven da 28 onns è bain creschì si cun bab e mamma, dentant è el vegnì adoptà:
Bleras persunas din: Ti ès sco tes bab e tia mamma. E quai betg perquai che jau guard ora tuttina sco els. Mabain pervia da las valurs che mes geniturs han mussà a mai.
Mirco Tscharner di vinavant ch'in pèrin schvul u lesbic prendia sapientiv la decisiun per in uffant. Quai perquai ch’i na possia là betg capitar che l’uffant saja in accident e n'è betg planisà. E gest cun quai ha Anton Capaul in problem.
I na dat nagin dretg sin uffants, ma tar la lètg datti in dretg. E dus umens na san simplamain betg survegnir uffants. Clar, i dat il giavisch d’avair uffants ma insanua ha la natira mess cunfins.
Quai argument lascha il giuven da Schiers dentant betg valair: Ils carstgauns fetschian ozendi uschè u uschia bler che na saja betg natiral, quai saja in argument d'avant 100 onns.
Per il bun da l'uffant
Nua ch'ils dus umens èn da la medema opiniun: I giaja en emprima lingia per il bun da l’uffant. Ma quai purtret vesa tar omadus ora in zichel different.
Persunas che din ch’in uffant dovra in bab ed ina mamma na vivan betg en la realitad. I dat uschè blers geniturs ch'èn divorziads e là sto l’uffant era be viver cun ina part dals geniturs.
Pia, era entaifer la communitad da LGBTQ+ datti differentas opiniuns. Ma malgrà ch'ils dus umens omosexuals n’èn betg tar tut ils puncts da la votaziun «lètg per tuts» da la medema opiniun, per omadus èsi cler ch'els vegnan a votar Gea.
