La PPS dal Grischun na fa nagina recumondaziun co votar davart la «lètg per tuts». Delegadas e delegads han decis a lur radunanza da dar liber la vusch.
Tenor la lescha actuala pon pèrs omosexuals be sa laschar registrar – dentant betg maridar. Quai duai sa midar cun la «lètg per tuts»: Era pèrs omosexuals duain dastgar maridar ed avair ils medems dretgs, sco per exempel survegnir pli simpel il dretg da burgais, adoptar u far diever da la medischina da reproducziun.
Cunter questa decisiun dal parlament federal ha in comité fatg il referendum e perquai votescha la Svizra ils 26 da settember.
Na a l'iniziativa 99%
Clermamain Na di la PPS grischuna a l'ulteriura votaziun dals 26 da settember – l'Iniziativa 99%, lantschada dals Giuvens socialists. A la radunanza da delegads a Lavin ha Sandra Adank, commembra da la suprastanza chantunala da l'Uniun grischuna d'artisanadi e mastergn, pledà per in Na. L'iniziativa da la JUSO purtass be donns: KMU's, manaschis da famiglia, startups, investurs pitschens, proprietaris da chasa e purs fissan confruntads cun massivamain pli autas contribuziuns. Ella è perquai persvadida ch'ina chargia fisicala pli auta na gida betg a la superaziun da la crisa.
Ord l'archiv:
