Il chantun Grischun vul sajettar plirs lufs pervi dals animals da niz stgarpads. Sin diversas alps grischunas han lufs stgarpà pliras nursas e chauras sco era asens e vadels. E quai malgrà che las mesiras per proteger las muntaneras èn vegnidas rinforzadas, uschia communitgescha l'Uffizi da chatscha e pestga.
Luf cun cumportament problematic en il Partenz
Sco il manader da l’uffizi Adrian Arquint, ha ditg envers RTR, crodia en egl spezialmain in luf en il Partenz. En pauc temp haja el stgarpà pliras nursas en ina zona protegida. Quest luf dastgia la surveglianza da chatscha grischuna uss sajettar, ha ditg Adrian Arquint.
Tar il luf en il Partenz èn las premissas da la lescha dadas. Quel ha stgarpà almain 10 animals protegids. Nus lain sajettar quest luf cun in cumportament problematic.
Tar lufs singuls saja pli simpel da dar questa lubientscha. Quai giaschia en la cumpentenza dals chantuns. Pli cumplitgà èsi tar ils trieps. Bain hajan era ils trieps da Valgronda e Stagias surpassà las limitas da stgarps. Là stoppian ins dentant emprim sclerir sch'ils trieps hajan gì pitschens questa stad e dumandar per lubientscha a Berna. Pir lura dastga il chantun prender mesiras. Ma en general valia ch'ils lufs emprendian in da l'auter da surpassar cunfins, uschia Arquint.
Ils lufs emprendan e dattan vinavant il cumportament a lur pigns. Nus vesain che las mesiras da protecziun vegnan a cunfins, perquai stuessan nus pudair intervegnir pli svelt.
