Siglir tar il cuntegn

Header

audio
Impurtanza e svilup da la litteratura rumantscha
Or da Actualitad dals 14.10.2021.
laschar ir. Durada: 05:42 minutas.
cuntegn

Linguista Silvana Derungs «La litteratura rumantscha è viscla»

Co statti cun la litteratura rumantscha? Tge datti per svilups? Tge èn las sfidas per ils proxims onns?

«La litteratura rumantscha è viscla», di la linguista e redactura tar il Dicziunari rumantsch grischun (DRG) Silvana Derungs en vista al festival da litteratura Nairs. Ed ella sa sviluppeschia permanentamain vinavant.

La litteratura va cun il temp e cun la societad. Ella reflectescha il mument.
Autur: Silvana Derungs Linguista e redactura tar il DRG

Entant ch'il focus da la litteratura era pli baud pli fitg tar l'ambient, la natira, animals e bestgas (ch'èn era tema dal festival Nairs) è quel oz pli fitg tar dumondas socialas, dumondas da l'identitad, la rolla da la societad u la globalisaziun. Er possian ins observar ch'i dettia en il mument bleras auturas rumantschas, sco per exempel Viola Cadruvi, Flurina Badel u er Barla Coluccello. Quellas dettian segir schlantsch a la scena e stgaffeschian er in auter maletg per la litteratura rumantscha. Che la scena saja daventada pli feminina na less Silvana Derungs però betg pretender.

Dapli furmas, dapli formats

In svilup ch'ins possia er observar ils ultims onns è ch'i dettia adina dapli novas furmas. En pli vegnia er producì dapli en furmas bilinguas. Betg be dad Arno Camenisch, mabain er uschiglio. Quai saja forsa er in pass che la litteratura stoppia far, betg per esser relevanta, mabain per esser vesaivla sur ils cunfins da la Rumantschia ora.

I dat adina dapli novas furmas e formats.
Autur: Silvana Derungs Linguista e redactura tar il DRG

Er dettia adina dapli occurrenzas da «spoken word», novs formats da producziun, novs formats per la litteratura – in svilup legraivel. Tge ch'i dastgess però dar dapli en l'avegnir, sajan discurs sur da la litteratura, uschia Derungs. Quai manchia ad ella en il mument. Durant il festival Nairs sco er als Dis da litteratura a Domat vegnì però segir a dar quels.

Silvana Derungs

Avrir la box Serrar la box

Silvana Derungs ha studegià lingua e cultura rumantscha, filologia romana ed etica da l’ambient a Friburg. Ella è stada commembra dal comité dals Dis da litteratura a Domat e presidenta da l’Uniun per litteratura rumantscha. Uss è ella redactura a l’Institut dal Dicziunari Rumantsch Grischun e coredactura da la publicaziun «Litteratura».

RTR actualitad 08:00

Artitgels legids il pli savens

Scrollar a sanestra Scrollar a dretga