Il project «agricultura neutrala al clima Grischun» ha preschentà ils emprims resultats da lur project da pilot. En in'emprima fasa han ins vulì chattar ora, nua ch'ils gas da serra vegnan insumma producids sin ils 52 manaschis purils che sa participeschan:
- Passa la mesadad da tut las emissiuns vegnan dal tegnair animals. Il metan ord ils maguns dals animals ed il gas ilarant da la grascha natirala èn omadus gas da serra potents.
- In quart da las emissiuns vegnan d'uschenumnadas «prestaziuns preliminaras», vul dir, products che vegnan cumprads dal manaschi. Pavel fa qua ora la gronda cumpart, quai cumpiglia dentant era energia u pesticids.
- Be 6% dals gas da serra vegnan da las maschinas agriculas.
Labor al liber
Ils manaschis participads al project han sviluppà 57 differents projects en las spartas «cultivaziun da plantas», «tegnida d'animals», «energia» e «commerzialisaziun». Quels projects vegnan uss mess en pratica sin ils bains purils en l'entir chantun Grischun ed accumpagnads scientifficamain. Sco ils responsabels scrivan, in project unic en svizra, cun in grond «labor al liber Grischun». Quels projects cuzzan fin il 2025. Davent dal 2026 fin il 2030 duain lura ils projects ch'han gì success vegnir implementads en l'entira agricultura grischuna.
Gas da serra en Svizra
L'agricultura fa ora radund 14% da tut las emissiuns da gas da serra en la Svizra.