Siglir tar il cuntegn

Header

cuntegn

Midadas da spertadad Tempo 30 fetschia per gronda part senn

Ord vista da la planisaziun da traffic pledan ils blers arguments per zonas da tempo 30. Tempo reducì vegn introducì ord motivs da segirezza e sco mesira per la protecziun cunter canera.

Tenor il planisader da traffic Reto Barandun fa tempo reducì senn dapertut là, nua ch'i dettia deficits da segirezza. Pia là nua ch'i dat in privel tras ils autos per auters participants e participantas dal traffic. Ozendi vegnia tempo 30 era duvrà sco mesira da protecziun cunter la canera. I dettia mo paucs cas, nua ch'ina reducziun da tempo na fetschia nagin senn, sco per exempel sin vias da transit tras in vitg. Là vulian ins chanalisar il traffic sin las vias da transit ed evitar ch'ils automobilists guntgeschian sin vias dal quartier, pia là fetschia tempo 50 dapli senn.

audio
Tempo 30: Cura fai senn – il planisader da traffic Reto Barandun
ord Actualitad dals 14.12.2021.
laschar ir. Durada: 2 minutas 40 Secundas.

Zona 30 plirs effects per la segirezza

Cun tempo 30 hajan ins dapli temp da reacziun, ins possia franar pli spert ed ins vesia plitost sche per exempel in uffant siglia en via. Sch'i dettia in accident cun in pedun u in ciclist lura saja quai cun tempo 50 pli malsegir che cun tempo 30. En general dian ins, ch'ina collisiun cun in auto che va cun 50 km/h saja da cumparegliar cun crudar ord la terza auzada. Ina collisiun cun tempo 30 possian ins cumparegliar cun crudar ord l'emprima auzada. In automobilist na saja era betg bler pli plaun sin ina via cun tempo 30, quai perquai che la distanza tranter ils autos saja cun tempo reducì pli pitschna e dapli autos hajan uschia plaz sin la medema distanza.

La perdita da temp en ina zona da 30 è minimala. Per tschient meters è quai forsa ina secunda.
Autur: Reto Barandun manader da partiziun planisaziun da traffic (HMQ AG)

Lescha federala

Avrir la box Serrar la box

Per pudair reducir la spertadad maximala generala da 50 km/h dettia tenor il reglament da signalisaziun quatter raschuns:
• sch'in privel è prevesibel be grev u betg ad uras ed i na dat nagin'autra pussaivladad dad eliminar quel
• sche auters participants dal traffic dovran protecziun speziala che na sa betg vegnir cuntanschida en in'autra moda e maniera
• sche l'andament dal traffic duai vegnir megliurà sin in tschancun
• sch'ins vul reducir grevezzas per l'ambient sco per exempel canera

Per pudair introducir ina zona da tempo 30 sto la vischnanca laschar far in'expertisa per demussar ils basegns da reducziun dal tempo. Il rapport giaja alura al chantun, là decidia la cumissiun responsabla sche las premissas per ina zona da tempo 30 sajan avant maun u betg. Per ina via da quartier u ina uschenumnada «via orientada a l'abitadi» vegnia la reducziun dal tempo per il pli lubida dal chantun. Auter saja quai tar ina via da transit, ina uschenumnada «via orientada al traffic», per quellas saja fitg grev da survegnir la lubientscha d'introducir ina zona da tempo 30.

audio
Cundziuns legalas per pudair realisar tempo 30
ord Actualitad dals 14.12.2021.
laschar ir. Durada: 2 minutas 40 Secundas.

Ina midada dal reglament da signalisaziun per far pli simpel la reducziun dal tempo sin vias da quartier è ina procedura da presa da posiziun tar la Confederaziun. Lasuenter duvrassia en il futur nagin'expertisa pli per dastgar introducir ina zona da 30 sin ina via da quartier (via orientada a l'abitadi). Per vias da transit (vias orientadas al traffic) resta il reglament.

RTR actualitad 08:00

Artitgels legids il pli savens

Scrollar a sanestra Scrollar a dretga