Siglir tar il cuntegn

Header

audio
Emna da vaccinar naziunala
Or da Co e cum dals 08.11.2021.
laschar ir. Durada: 1 minuta 51 Secundas.
cuntegn

«Mintga vacczinaziun quinta» Emna da vaccinar naziunala ha cumenzà

Infurmaziun, cussegliaziun e purschida da vaccinar en il Grischun durant l'emna da vaccinar.

Per l'Uffizi da sanadad grischun stattan l'infurmaziun ed ina vasta purschida da cussegliaziun en il center durant l'emna naziunala da vaccinaziun dals 8 fin ils 14 da november.

Sco il chantun scriva, èn las cussegliaziuns tar las medias e medis da chasa gratuitas durant l'entir mais da november. Las purschidas per vaccinaziuns senza preannunzia vegnan schlargiadas ferm l’emna che vegn. Sper ils centers da vaccinaziun porschan era tut las apotecas e medis da chasa la pussaivladad da sa laschar vaccinar senza preannunzia.

Vinavant porschan era singulas vischnancas sairas d'infurmaziun. Per exempel a Scuol, Stampa e Val Müstair datti occurrenzas cun referats da medias e medis per dar scleriment. Là han las visitadras ed ils visitaders era la pussaivladad da tschentar dumondas e far discussiuns.

 Furna ha per exempel organisà in taxi per sias abitantas ed abitants che charrescha els en l’ospital da Schiers per laschar virolar.

Per l'emna da vaccinaziun survegn il chantun trais milliuns francs da la Confederaziun. La gruppa en mira en il Grischun, sajan cunzunt las persunas che na sajan anc betg sa decididas sch'ellas lessan sa laschar vaccinar u betg. Quai èn radund 6% da la populaziun. La finamira fiss da cuntanscher 5% dad quellas persunas. Tenor il minister da finanzas, Christian Rathgeb rendia quest sforz, era sche la gruppa en mira saja pitschna. Mintga persuna che giaschia numnadamain pervi da Covid-19 sin la staziun intensiva dovria passa quatter persunas da la tgira che manchian en quest mument en auters lieus.

video
Emna da vaccinar naziunala – Tge è previs en il Grischun?
Or da Telesguard dals 03.11.2021.
laschar ir. Durada: 2 minutas 49 Secundas.
audio
Emna naziunala da vaccinar en il Grischun
ord Actualitad dals 03.11.2021.
laschar ir. Durada: 3 minutas 9 Secundas.

«Mintga vacczinaziun quinta»

Ensemen cun represchentants e represchentantas dals chantuns han ils cussegliers federals Guy Parmelin ed Alain Berset preschentà l'emna da vaccinaziun naziunala avant las medias a Berna. La pandemia haja anc adina il potenzial da surchargiar il sistem da sanadad, uschia il president da la coferenza dals directurs da sanadad chantunals, Lukas Engelberger. Las stentas da persvader insatgi da sa laschar vaccinar creschian, ma mintga vaccinaziun quintia.

video
Lukas Engelberger: «Memia bleras persunas èn anc periclitadas»
Or da News-Clip dals 03.11.2021.
laschar ir. Durada: 33 Secundas.

La Confederaziun investescha en l'emna da vaccinaziun maximalmain 96 milliuns francs. La finamira principala saja d'infurmar, uschia il minister da sanadad Alain Berset. I giaja per cuntanscher las persunas indecisas. Quellas duajan survegnir infurmaziun e cussegliadas. Plinavant pussibiliteschi la purschida da sa laschar vaccinar senza preannunzia, tranter auter en ils 42 bus da vaccinar che sajan da viadi. Ed il cusseglier federal ha anc ina giada intunà il niz dal vaccin: En media possian 50 vaccinaziuns evitar ina ospitalisaziun ed sin 150 viroladas u virolads possia in cas sin la staziun intensiva vegnir evità. Tenor la directura da sanadad dal chantun da Turitg, Natalie Rickli, saja la vaccinaziun la pli svelta via ord la pandemia.

video
Alain Berset: «Gea, las stentas per l'emna naziunala rendan»
Or da News-Clip dals 03.11.2021.
laschar ir. Durada: 30 Secundas.

Tge che capita sche l'emna naziunala na porta betg l'augment da vaccinaziuns giavischà, han ils cussegliers federals laschà avert. Ina fasa da normalisaziun sco quai ch'ella saja vegnida planisada avant la stad, na saja betg pli realistaica. I giaja per evitar ch'il sistem da sanadad vegnia surchargià e per evitar in lockdown.

RTR novitads 11:00

Artitgels legids il pli savens