Siglir tar il cuntegn

Header

cuntegn

«Morala dubla» Plevons conservativs restan critics

Ils tschintg d'avrigl ha l'uvestgieu da Cuira preschentà in codex da cumportament per evitar abus sexual e spiritual. Cunter quest codex datti uss resistenza. Ina gruppaziun da passa 40 plevons dal circul da Cuira refusan da suttascriver il codex. Sco els decleran vulan els rimnar suttascripziuns encunter quest codex da cumportament.

Plevons restan critics

L'uvestg Joseph Maria Bonnemain resta persvas dal codex cun reglas cunter abus en la baselgia. Sco la plattafurma online kath.ch scriva, ha l'uvestg Bonnemain discurrì cun ils plevons conservativs l'entschatta da l'emna. Quels restian però medemamain critics envers il codex. Ils 13 da zercladur duai dar ulteriurs discurs, hai num vinavant.

Quant bleras persunas che partian questa critica na saja betg cler. Uffizialmain sajan be duas persunas criticas enconuschent: Quella da Roland Graf e da Franz Imhof. Ils dus canonis hajan empruvà d'impedir Bonnemain sco uvestg da Cuira a chaschun da la sesida dal chapitel da la catedrala il november 2020.

Sustegn dal papa

Durant che ils plevons conservativs fan cunter l'uvestg Joseph Bonnemain, survegn quel sustegn da Roma. Il president da la confederaziun Ignazio Cassis ha ditg venderdi suenter l'audienza da papa che Franziskus saja «fitg cuntent» cun l'uvestg Joseph Bonnemain.

Ils blers plevons sustegnian Bonnemain

Il circul da Cuira stat be per ina minoritad dals plevons en l'uvestgieu da Cuira. Ils plevons Mario Pinggera e Josip Knežević han crititgà fermamain il cumportament dal circul e supplitgà a l'uvestg Joseph Bonnemain da tegnair curs.

La Bibla di: Omesexualitad n'è betg en urden

La gruppaziun è d'accord cun 95% da las reglas prescrittas ed era cun l'impurtanza da la prevenziun per evitar abus sexual e spiritual. Dentant cuntrafetschia il codex, ch'è vegnì suttascrit da l'uvestg Joseph Maria Bonnemain, a la doctrina e disciplina da la baselgia catolica ed en general a la lescha da la baselgia.

En il codex stat per exempel scrit ch'i saja scumandà da giuditgar davart persunas omosexualas e sa cuntegnair omesexual. La gruppaziun da bun 40 plevons citescha dentant la ductrina che sa basa sin la bibla e di: Omosexualitad n'è, da princip, betg en urden.

Bonnemain deplorescha questa decleraziun publica

L'uvestg prenda serius questa posiziun, tut auter signifitgass ch'el na respectia betg quella gruppa da plevons. Sco l'uvestgieu scriva en ina communicaziun, haja il circul da Cuira dumandà l'uvestg da betg suttascriver, in di avant la suttascripziun. Sin quai haja Bonnemain respundì ch'el veglia vegnir ensemen cun tuts per discutar. El deplorescha che questa decleraziun saja ida directamain al public senza in discurs persunal. El veglia dentant er vinavant s'engaschar per scleriment.

Il circul da Cuira scrivia sez che 95% dal codex sajan criteris ch'i dovria per ina prevenziun effectiva. Singulas passaschas stoppian ins leger e tematisar en il dretg context. La decleraziun dal circul na saja qua betg differenziada avunda.

Ord l'archiv

video
Diocesa Cuira preschenta in codex cunter abus en baselgia
Or da Telesguard dals 05.04.2022.
abspielen. Laufzeit 4 minutas 12 Sekunden.

RTR novitads 17:00

Artitgels legids il pli savens

Scrollar a sanestra Scrollar a dretga