Ils 5 da mars 1972 han ils umens grischuns decis d'accordar a las dunnas il dretg da votar e dad eleger chantunal. Quai in onn suenter ch'il dretg da votar ed eleger naziunal è vegnì introducì. Quel giubileum ha il post da stab grischun per l’egualitad da las schanzas per dunnas ed umens festivà sonda a Cuira.
Co statti cun l'egualitad en Grischun?
Bler saja gia capità, di Susanna Mazzetta, collavuratura giuridica dal stab da damondas d'egualitad, dentant sajan anc adina mo var 20% da las persunas en la politica grischuna dunnas. Per midar quai stoppian las rollas tipicas da genders vegnir deconstruidas, uschia che mintgin e mintgina possia far quai, en quai ch'el u ella è il meglier. Ina part impurtanta saja era la repartiziun eguala da lavur pajada e nunpajada tranter um e dunna.
Dunnas fan anc adina ⅔ da la lavur betg pajada
Per cuntanscher quellas finamiras stoppian dentant anc sa midar las structuras dal mintgadi, sco tar las pajas u las pussaivladads da differents models da lavur. A la fin finala duess mintgin decider per sasez tge model da vita ch'el vul, dentant stoppia mintgin avair la pussaivladad da decider quai, e quellas cundiziuns na sajan anc betg avant maun.
«Vuschs visiblas» – La festa da giubileum
En la halla sut la chasa municipala han gì lieu pliras performanzas dal toc «vuschs visiblas». Plinavant hai dà in'exposiziun mobila. Quella ha dà in'impressiun davart il cumbat electoral – tranter auter cun citats da brevs da lecturas e lecturs ord las gasettas dals onns 60 e 70.
Adattà al tema
In onn avant la votaziun en Grischun han ils umens svizzers acceptà il dretg da vuschar da las dunnas – quai cun 65,7% Gea.
