Per far quai vegnan dus programs h'èn gia en acziun colliads en il champ spezial «medischina da chasa». Il november passà aveva la regenza decis da promover pli fitg la furmaziun en ils rom dals dus projects «Curriculum da medias e medis da chasa» e «Capricorn». Quai tranter auter cun in'augment da las capacitads ed ina pli ferma finanziaziun dals dus projects.
Ils proxims onns van radund in terz dals medis e las medias da chasa en il chantun Grischun en pensiun. Perquai ha l'ospital chantunal elavurà quest concept. Cun il champ spezial vulan ins er mussar quant impurtant ch'il provediment decentral en Grischun saja.
Savida impurtanta mancava
Persunas che han finì il studi da medischina e vulan daventar medi spezialisà han enfin ussa stuì organisar sez la scolaziun da 5 onns en in’ospital. Uschia vegniva dentant insatge impurtant per l'atgna pratica a la curta – la medischina ambulanta, di Edith Öchslin, l'anteriura presidenta dals medis da chasa dal Grischun.
Differentas disciplinas
En la nova scolaziun n'emprendan ils medis e las medias da chasa dal futur dentant betg mo la medischina ambulanta, mabain era autras disciplinas. Uschia pon els per exempel lavurar tar in medi spezialisà sin culiez, nas ed ureglias, en ina clinica da dunnas u tar in medi d'uffants. Entaifer quest temp han els era la pussaivladad da lavurar mez onn tar in medi da chasa.
Cunquai ch'els vulan surprender in di in'atgna pratica, fai senn ch'els lavuran er in temp tar in medi da chasa.
La nova scolaziun per las medias ed ils medis da chasa è ussa pli cumpacta ed uschia han ils absolvents e las absolventas era finì avant. Perquai duain els er vegnir accumpagnads suenter la scolaziun. Per exempel da chattar ina plazza sco medi superiur en in’ospital regiunal. Là pon els lura lavurar per intgins onn avant ch'els surpiglian in'atgna pratica.
