Il matg 2019 ha la populaziun da Cuira approvà in credit d'investiziun da 24,4 milliuns francs (+/- 25%) per remplazzar la pendiculara da Brambrüesch. Quest credit cumpiglia er ils custs per ils bajetgs en la citad, la staziun a miez e la staziun sisum la muntogna. Il restaurant da panorama a Fülian, vulan las pendicularas realisar cun il chapital da participaziun dals furniturs cun 7% dal volumen.
Pendiculara custa 3 milliuns francs dapli
La pli gronda sfida finanziala saja il lung temp tranter il 2017 cura ch'ins haja fatg il quint d'investiziun per la pendiculara ed il 2026 cura che la pendiculara duai vegnir en funcziun. Oriund eran planisads 12 milliuns per la pendiculara. La cabina nova custa dentant 3 milliuns dapli che budgetà. Per pudair reducir la canera uschè bain sco pussaivel, stoppian ins investir 1,7 milliuns dapli. Il pretsch d'atschal che saja ì ensì ed er per autras materias primas, custia radund 1,4 milliuns dapli che previs. Il mument èn las pendicularas da Brambrüesch vid planisar las trais staziuns. Ils custs per quellas na pon betg surpassar ils 24,4 milliuns (+/-25%).
La decisiun per la pendiculara da Garaventa saja stada unanima en il cussegl d'administraziun da las pendicularas. La Garaventa SA tutga tar la gruppa austriacca da Doppelmayr ch'è dominatur dal martgà.
Ils proxims pass
Suenter ch'il project per la pendiculara è surdà, vai uss per serrar giu ils projects pertutgant la planisaziun dal territori e pertutgant la cumportabilitad per l'ambient. Lura vegn elavurà fin l'emprim quartal 2023 la dumonda da bajegiar. Per quel vegn la lubientscha lura da l'Uffizi federal da traffic. La lubientscha vegn spetgada per l'entschatta 2025. Suenter che la halla da la citad ven lura spazzada il medem onn, duai la nova pendiculara vegnir averta il december 2026.
