Las pendicularas svizras han cumenzà bain l’onn nov. Tar las emprimas entradas sco er tar la svieuta han ellas registrà in plus da bun 40% cumpareglià cun la stagiun passada. Il schaner haja la branscha surtut pudì profitar da la fitg bell’aura la fins d’emna, scriva l’uniun Pendicularas svizras. Gidà haja era che la gastronomia en muntogna haja puspè pudì retschaiver giasts grazia a la regla da 2G.
Betg dapertut tuttina grond plus
En las regiuns n’è il svilup betg stà dapertut il medem. Tar ils victurs tutgan tranter auter il Grischun, la Surselva bernaisa e las regiuns da la Svizra centrala. Il Grischun ha nudà 40% dapli svieuta e bun 39% dapli giasts (emprimas entradas) cumpareglià cun l’onn avant. In minus han sulettamain las regiuns en il Giura nudà cun -37% tar la svieuta e -39% tar las emprimas entradas. Quai ha tenor l'uniun da las pendicularas però da far cun las temperaturas miaivlas.
