Dapi ch'il Cussegl federal ha introducì l'obligatori dal certificat, han apotecas, centers da tests e praticas da medis stuì testar marcantamain dapli persunas. Per che questas structuras na vegnian betg surchargiadas ils proxims mais, porschia il chantun questa pussaivladad. Actualmain sa participeschan radund 2'000 interpresas als tests en il Grischun.
Co survegnir il certificat?
Gia cura ch'ins far il test da corona – sur il manaschi ora – pon ins dumandar il certificat sur la plattafurma easytesting.ch. Sch'il resultat è negativ, survegn ins il certificat per SMS u posta electronica. Quel vala lura 72 uras a partir da la registraziun da la prova.
Persunas senza sintoms ch'han gia survegnì l'emprima dosa dal vaccin e che dovran in certificat pon laschar testar gratuit en in center da test, quai enfin ils 30 da november. Per persunas cun sintoms, uffants e giuvenils sut 16 onns sco er persunas che na pon betg laschar vaccinar restan ils tests svelts d'antigens er suenter gratuits.
