Il Cussegl federal ha decidì:
A partir dals 11 d'october finanziescha la Confederaziun
- ils tests da persunas sut 16 onns.
- ils tests da persunas che spetgan sin la segunda dosa (fin la fin da november).
- ils custs dal certificat per firmas che fan tests repetitivs
Il Cussegl federal trametta en consultaziun:
In plan per in'offensiva da vaccinar
- cun 170 posts da vaccinar mobils supplementars
- cun 1'700 persunas supplementaras che cusseglian persunas indecisas
- cun dar in bon da 50 francs a persunas che vegnan da persvader auters da sa laschar vaccinar
Era sch'il dumber d'infecziuns saja regressiv per il mument, restia la situaziun sin las staziuns intensivas vinavant tendida, communitgescha il Cussegl federal. Il ristg d'in'ulteriura unda saja però anc real – surtut ussa durant ils mais pli fraids d'atun ed enviern. Ed ina tala strapatschassia puspè las capacitads dals ospitals.
Tests pajads mo per minorens sut 16 e tgi che spetga sin la 2. dosa
Ussa èsi definitiv: A partir dals 11 d'october custan ils tests da corona ch'i dovra per il certificat. Excepziuns datti mo pli per persunas che spetgan sin la segunda dosa – quai anc fin la fin da november. Era persunas sut 16 onns pon vinavant sa laschar testar senza stuair pajar sez. Quai ha decidì il Cussegl federal.
Offensiva da vaccinar per e cun l'entira populaziun
En Svizra èn radund 58,5% da la populaziun vaccinads cumplainamain (en il Grischun èsi bun 58%). Quai saja ina da las quotas las pli bassas da tut ils stadis en l'Europa. Cun schlargiar l'obligatori da certificats saja il dumber da vaccinaziuns bain creschì. Ils ultims dis saja quel però puspè regressiv. Per surmuntar la pandemia dovria quai però autras quotas da vaccinar.
Concret duvrassi tenor las calculaziuns dals experts tar las persunas sur 65 onns ina quota da vaccinaziun tranter 90 e 95% (actualmain èsi 88.5%) e tar la populaziun tranter 18 e 65 onns ina quota dad 80% (actualmain èsi 71%).
Perquai planisescha il Cussegl federal ina offensiva da vaccinar ensemen cun ils chantuns. Quai tranter auter cun in'emna da vaccinar naziunala, ulteriurs 170 posts da vaccinar mobils, offertas d'infurmaziun persunalas e cun bons da 50 francs per persunas che vegnan da persvader autras da sa laschar vaccinar. Questas propostas van ussa en consultaziun tar ils chantuns. En duas emnas vul il Cussegl federal lura decider.
