Las medias svizras èn sut squitsch. Daners da reclama van da bun adina pli savens a concerns d’internet internaziunals. Dapi il 2003 èn passa 70 gasettas svanidas ord il sortiment svizzer. Entras quai pateschan ils rapports davart quai che curra e passa. Per che Svizras e Svizras san tge che capita en lur conturn dovra quai gasettas, emetturs da radio e televisiun sco er medias online che rapportan dals eveniments locals e regiunals. Perquai vulan il Cussegl federal ed il parlament promover las medias localas e regiunalas cun in pachet da mesiras per las medias da 151 milliuns francs l’onn. Il comité da referendum è cunter quest pachet.
Il Cussegl federal e la maioritad dal parlament sustegnan il pachet da mesiras. En il parlament èn quai represchentantas e represchentants da la Partida socialdemocratica e dals Verds. Las fracziuns da l’Allianza dal Center, dals Verdliberals sco er dals liberaldemocrats n’èn betg stadas perina.
A la testa dal comité che vul il referendum è l’anteriur cusseglier naziunal e liberaldemocrat Peter Weigelt dal chantun Son Gagl. Il pachet da mesiras saja sfarlattim da daners, argumentescha il comité Na.
Las parolas èn cleras: Entant che la dretga refusa il sustegn per las medias, sustegn ch'il center e la sanestra quel.
Ils 13 da favrer decida la Svizra en tut davart quatter fatschentas.
Sin in clic tut quai ch'igl è da savair avant che votar: rtr.ch/votaziuns
