Fertant che Stefan Engler (Allianza dal center) defenda il pachet da mesiras per medias pledescha Martin Schmid (Partida liberaldemocratica) encunter.
A Martin Schmid disturba oravant tut ch'era chasas edituras grondas pudessan profitar dal sustegn per las medias. Sco exempels numna el la TX Group (ant. Tamedia), Ringier u CH Media. Quellas chasas edituras grondas na dastgan tenor il liberaldemocrat betg survegnir raps supplementars. Per Stefan Engler è quai damain in problem. La lescha da medias prevesia numnadamain in sistem degressiv. Pli gronda ch’ina chasa editura è, pli pauc ch'ella survegn. Uschia saja garantì, ch'il grond sustegn va a las chasas edituras pitschnas e mesaunas. Uschia survegnissan las chasas edituras grondas mo sustegn per il transport da las gasettas.
Dependenza dal stadi?
Ils dus cussegliers dals chantuns n’èn era betg da perina sch'i va per la funtauna da finanziaziun. Uschia vesa Martin Schmid in problem da dependenza, sche la Confederaziun dat raps a las chasas edituras. Tenor el creescha quai ina dependenza politica. Stefan Engler dat contra: gia oz vegnan diversas chasas da medias sustegnidas da la Confederaziun e tuttina restan schurnalistas e schurnalists independentas.
Infurmaziuns regiunalas
In pli grond problem vesa Engler là tar investiders privats che vulan avair influenza sin l’infurmaziun che la populaziun survegn. Quel problem hajan ins betg cun sustegn da la Confederaziun, di il politicher da l’Allianza dal center Stefan Engler. Per el saja impurtant ch'era regiuns perifericas hajan vinavant il dretg sin infurmaziuns da la regiun. Quai saja in punct da gronda relevanza per la democrazia directa. Uschia saja la populaziun er infurmada per exempel davart decisiuns en vischnanca. Quel punct sustegna era il liberaldemocrat Martin Schmid. Dentant stoppian tenor el las medias privatas chattar ina atgna soluziun encunter la mancanza da las entradas ord la reclama, che va adina dapli als concerns gronds sco Google e Facebook. Mancanzas che, tenor Engler, na sappian dentant mo uschia vegnir cumpensadas.
Il pachet da mesiras per medias procura per grondas discussiuns e debattas diras. Finalmain ha il suveran l'ultim pled a l'urna ils 13 da favrer.
Sin in clic tut quai ch'igl è da savair avant che votar: rtr.ch/votaziuns
