Cunzunt giasts da la Svizra han pernottà bler pli savens en il Grischun il 2021, cumpareglià cun la media dals davos tschintg onns. Igl è in augment da 28,2% sin passa 4 milliuns pernottaziuns.
Las bleras regiuns cun in plus
Cun cumparegliar las cifras dal 2021 cun quellas da l'onn avant – è da vesair che sulet duas regiuns grischunas han pers levamain pernottaziuns. La destinaziun turistica Arosa ha nudà cun var 360'000 pernottaziuns in minus da 2,6%. Ed en il Partenz hai dà l'onn passà cun circa 62'000 pernottaziuns, 0,7% damain ch'il 2020.
Svizra cun in minus
Auter vesan las cifras svizras dal 2021 ora, sch’ins cumpareglia quellas cun la media dals davos tschintg onns. Ils hotels svizzers han nudà l’onn passà cun var 30 milliuns pernottaziuns, in minus da 15%. Las pli fermas digrens hai dà en regiuns da citads sco Genevra, Turitg, Basilea e Berna. In ferm augment da 30% po il Tessin nudar.
Bunas vistas per il proxim temp
Gia per l'onn proxim possia la branscha turistica en Svizra quintar cun tuttina bler giasts europeics sco avant la crisa da pandemia. Quai ha ditg il directur da Svizra Turissem Martin Nydegger a chaschun da la conferenza da medias annuala da l'organisaziun. Tar ils giasts da surmar pudess quai dentant duvrar in pau dapli temp.
Da patir han gì l'onn 2021 ils hotels en las citads. Quels n'han betg pudì profitar dal trend tar Svizras e Svizzers da passentar las vacanzas en l'agen pajais. Ils indigens han preferì da viagiar en ils culms u en la natira. E perquai ch'era ils giasts da fatschenta èn rars, èn ils hotels en las citads ils gronds perdents da la crisa da corona. Martin Nydegger quinta ch'il turissem da fatschenta na vegn mai pli a cuntanscher il livel da pli baud.
