Il settember da quest onn ha il Grischun nudà 0,3% dapli pernottaziuns ch'il settember 2020. En cifras abstolutas èn quai strusch 1'600 persunas. La gronda part dals giasts en il chantun èn anc adina Svizras e Svizzers. Cumpareglià cun il settember da l'onn passà è questa cumpart però vegnida in zic pli pitschna, numnadamin bun -10%. Quai tenor las ultimas cifras da l'Uffizi grischun per economia e turissem.
Tenor las regiuns è la situaziun fitg differenta. Uschia ha Lai gì radund 15% pli paucas pernottaziuns, fertant che Cuira ha puspè pudì nudar passa 30% dapli pernottaziuns cumpareglià cun l'onn passà. Guardà sur la media da 5 onns sa resulta dentant anc adina in plus da prest 18% per Lai ed in pitschen minus da 0,3% per Cuira.
22% dapli pernottaziuns en Svizra
In zic in'autra situaziun sa preschenta vis sur l'entira Svizra. En tut hai dà il settember 2021 in plus da passa 22%. Quai èn bun 3,3 milliuns pernottaziuns cumpareglià cun 2,68 milliuns pernottaziuns il medem mais da l'onn passà. En l'entira Svizra è il dumber da giasts da l'exteriur s'augmentà marcantamain cun in plus dad 86% cumpareglià cun la medema perioda da l'onn passà. Quai mussan las cifras da l'Uffizi federal da statistica.
