Perquai che la prontadad da sa laschar vaccinar crescha, ponderescha il chantun d'auzar las capacitads là nua ch'ins po laschar vaccinar. Plinavant vegn examinà, sch'ins duai stgaffir in center da walk-in permanent a Cuira per distgargiar ils centers da vaccinar, ha il minister da sanadad Peter Peyer ditg envers las medias.
Per il mument tanschian las mesiras
Las davosas emnas aveva il chantun Grischun ponderà dad ir pli lunsch cun l'obligatori dal certificat ed introducir era quel per il traffic public e las stizuns. Quai cunzunt er en vista a la stagiun d'enviern. La regenza ha dentant confermà che las mesiras actualas valian vinavant. Da schlargiar las mesiras restia ina mesira che vess in effect, sch'i faschess puspè da basegns. Per il mument funcziuneschia il sistem cun l'obligatori da certificat dentant bain e sche la prontadad da sa laschar vaccinar restia vinavant, possian ins tenor Peter Peyer forsa perfin puspè schluccar las mesiras per la stagiun d'enviern.
