Tgi che vul per il mument sa laschar vaccinar en in dals centers da vaccinaziun dal Grischun, sto per part avair pazienza. Il temp da spetga, per survegnir in termin variescha tranter in di e passa in mais. Sco la media chantunala Marina Jamnicki ha ditg, haja il Grischun bain avunda vaccins:
Dapi ch'il Cussegl federal haja ordinà l'obligatori dal certificat, sajan las annunzias puspè creschidas andetgamain. Ils centers ch'avevan reducì las capacitads, ston uss perquai puspè augmentar quellas. Plinavant saja ina sfida logistica da reparter ils vaccins, perquai ch'i dettia adina dapli pussaivladads da sa laschar vaccinar cun las acziuns da walk-in u er cun ils bus da vaccinar en las regiuns.
Chantun aveva spetgà augment
Sco RTR ha rapportà ier, aveva il chantun spetgà ch'i dettia dapli annunzias, damai ch'il certificat da corona è uss vegnì obligatoric ed il chantun ha anc ina giada schlargià pli ferm che la Confederaziun l'obligatori.
