En cumplettaziun da las mesiras da corona dal Cussegl federal ha la regenza grischuna decis ulteriuras mesiras. Quellas novas mesiras valan a partir da glindesdi, ils 13 da settember fin mardi, ils 30 da november.
Uschia dovri a partir da glindesdi in certificat da Covid valaivel (testà, vaccinà, guarì), avant ch'entrar en l'edifizi.
- per far visitas en ospitals
- en chasas da tgira
- servetschs da la tgira ed assistenza a chasa (Spitex)
- en chasas da dimora per persunas cun impediments
- en chasas da dimora per uffants e per giuvenils
- sco er en canortas d’uffants.
Per las visitadras ed ils visitaders da questas instituziuns vala l'obligaziun da preschentar in certificat valaivel avant ch'entrar en l'instituziun. Quai ha communitgà la regenza en il fegl uffizial dal chantun.
In resultat negativ en il rom dals tests en ils manaschis ha il medem status sco in certificat 3G da la Confederaziun. Il medem status han er auters tests admess da las autoritads u da las instanzas cumpetentas.
Tests obligatorics en il sectur da sanadad
En pli stoppia il persunal da talas instituziuns, che n’è betg vaccinà, far duas giadas per emna in test da corona. Quest obligatori na vala dentant betg per las scolas. Las novas mesiras valan fin ils 30 da november 2021.
Quantas persunas che lavuran en la tgira e ch'e n'èn betg vaccinadas, na po il minister da sanadad Peter Peyer betg dir.
En las chasas d'attempads dal Grischun è la quota da vaccinar fitg differenta. La pli bassa saja tar radund 40% dal persunal, la pli auta tar 100%.
Co realisar controllas è ina sfida
Per ils ospitals e las chasas da tgira sa tschenta uss la dumonda co realisar las mesiras dal chantun. Uschia po il Center da sandà Engiadina Bassa far las controllas en las chasas da tgira cun l'agen persunal. Per l'ospital èn ins anc vid sclerir sch'i dovra ina persuna externa. L'ospital da Tusaun per exempel vul engaschar ina persuna da segirtad per far las controllas. Raschun è ch'i dettia adina puspè situaziuns difficilas cun glieud che na vul vetg resguardar las reglas da corona.
Il Center da sanadad Savognin vul far sez las controllas. Dentant vulan els er porscher la pussaivladad da far visitas spontanas. Uschia hajan ins là la pussaivladad da far tests da corona sch'ins n'ha nagin test valaivel.
Finamira da vaccinaziun: 800 persunas per di
L'Uffizi da sanadad constatescha en l'entir chantun in ferm augment dals dumbers da cas. Per cuntanscher en il Grischun avant l'enviern ina quota da vaccinaziun suffizienta duain 800 persunas sa laschar vaccinar mintga di durant las proximas emnas.
Boom da vaccinar?
Il chantun quinta che puspè dapliras persunas sa laschan vaccinar il proxim temp cunter corona. Quai sco consequenza ch'il Cusegl federal ha decis d'introducir a partir da glindesdi in obligatori da certificat, uschia Rudolf Leuthold, schef da l'Uffizi da sanadad dal Grischun. Sur tut il bus da vaccinar che van en las regiuns sajan in success – damai che quai saja pli spontan e na pretenda nagina annunzia. Sche propi dapli glieud sa laschia vaccinar uss, lura possia dar tscherts temps da spetga davant quels bus.
