Siglir tar il cuntegn

Header

cuntegn

Pleds dal prim d'avust Guy Parmelin en Val Müstair

La visita en Val Müstair fa il president da la Confederaziun Guy Parmelin gia venderdi, ils 30 da fanadur. Sco la PPS dal Grischun scriva, è previs ina spassegiada la saira e silsuenter in pled festiv sin il Plaz Grond. Gia l'onn passà aveva Parmelin visità il Grischun e prendì part al brunch da la fundaziun Plankis a Cuira.

Insumma fa il president da la Confederaziun viadi en plirs lieus en Svizra enturn il prim d'avust.

Il sulet cusseglier federal che na tegn nagin pled durant la festa naziunala è Ueli Maurer. Il minister da l'exteriur Ignazio Cassis na tegna era nagin pled en Svizra, mabain en l'ambassada svizra a Bangkok en Tailanda.

Festivitads en l'entir Grischun

Tar las festas per il prim d'avust sa mussan grondas differenzas: Tgi ha envidà persunas prominentas e tgi fa plitost ina festa pli pitschna – era causa corona. Quai mussa ina retschertga che RTR ha fatg tar las vischnancas grischunas.

San Murezzan per exempel ha envidà l'anteriur chancelier tudestg Gerhard Schröder, la moderatura Eva Wannenmacher e l'actur Walter Andreas Müller. A Samignun tegna l'anteriur president tudestg Christian Wulff il pled festiv. Dentant era la prominenza politica sa preschenta a la festa naziunala, per exempel cun pleds da Hans Stöckli (Bever), Jon Pult (Churwalden), Anna Giacometti (Guarda e Samedan), Magdalena Martullo Blocher (Spleia), Jon Domenic Parolini (Scuol) ubain Peter Peyer (Zernez).

RTR actualitad 17:00

Artitgels legids il pli savens