Siglir tar il cuntegn

Header

cuntegn

Proximas votaziuns federalas 2x Gea a «La lètg per tuts» dals Verds e dals Verdliberals

I ha dà decisiuns cleras en favur da la «La lètg per tuts» tar ils Verds sco era tar ils Verdliberals. Las delegadas ed ils delegads han mintgamai decidì in Gea tar lur radunanzas a Friburg ed a Rüschlikon. E betg main cler è il signal da la Partida populara cunter la lescha da Covid-19.

Bunamain in quart tschientaner saja passà, dapi che l'anteriura cussegliera naziunala Ruth Genner haja pretendì en il parlament per l'emprima giada «La lètg per tuts», ha scrit la Partida verda Svizra sin Twitter. La decisiun da las delegadas e dals delegads sajan uschia era crudada a moda clera.

Ils Verdliberals ha prendì lur parola Gea senza ina cuntravusch, quai ha la partida medemamain communitgà via Twitter. I sa tractia d'ina da las pretensiuns da coc d'ina «politica sociala moderna e liberala».

La Partida populara percunter è cun in Na s'exprimida cunter la fatschenta. Ina maioritad dals delegads ha quitads per il bainstar dad uffants che vegnian tratgs si d'in pèr da la medema schlattaina.

Iniziativa da 99%

Cler cunter l’iniziativa dals Giuvens socialists è s’exprimida la Partida verdliberala. La decisiun è crudada cun 139 cunter 6 vuschs, e 3 abstenziuns. L’iniziativa saja sbagliada e manchentia la mira. Bain dovria ina refurma dal sistem da taglia, dentant betg uschia.

Medemamain in Gea din ils Verds. Unanimamain èn las delegadas ed ils delegads da l'avis che quai garanteschia ina meglra distribuziun da la ritgezza.

Sumegliant cler decidan ils delegads e las delegadas da la Partida populara svizra cunter l'iniziativa da 99%, quai cun 181 cunter 23 vuschs.

PPS per referendum cunter la lescha da Covid-19

Gia uss è la Partida populara sa fatschentada cun il segund referendum cunter la lescha da Covid-19. Tuttina sco sia partida giuvna, ha era la partida mamma decidì la parola Na a la lescha. Il resultat è stà cler cun 181 cunter 23 vuschs, e 4 abstenziuns. Davart questa fatschenta vuscha la Svizra ils 28 da november.

Era ils Verds han discutà ulteriuras iniziativas che spetgan sin ina votaziun. Els sustegnan l'iniziativa populara «Stop-F35» che sa drizza cunter la cumpra da 36 aviuns da cumbat americans. Vitiers han ils Verds annunzià il sustegn da la taglia individuala independenta dal stadi civil, e quella davart la responsabilitad envers l'ambient.

RTR novitads 14:00

Artitgels legids il pli savens

Scrollar a sanestra Scrollar a dretga