En concordanza cun la strategia chantunala d'immobiglias ha la regenza approvà l'installaziun d'in center administrativ regiunal a Puschlav cun var 17 plazzas da lavur. Ils sis servetschs chantunals Polizia chantunala, Servetsch social regiunal, Intermediaziun regiunala da lavur, Cussegliaziun da professiun, Inspecturat da scola e da scolina sco er Servetsch psicologic da scola duain vegnir reunids en in edifizi administrativ.
Lieu central
I sa tracta d'in bajetg existent a la Via da Spultri 42/44 che tutga a la Confederaziun, e che lezza dat a fit al chantun a vista pli lunga. L'immobiglia saja situada en in lieu central e cuntanschibla senza problems, scriva il chantun.
